कृष्णनगर भन्सारमा क्वारेन्टाइन चेकबिनै भित्रिए तीन ट्रक आँप

११ साउन, बुटवल। कृष्णनगर भन्सार कार्यालयबाट क्वारेन्टाइन चेकविनै तीन ट्रक आंप भित्रिएको पाइएको छ । साउन ९ गते भारतबाट आँप ल्याएका तीन ट्रकलाई कृष्णनगर भन्सार कार्यालयले क्वारेन्टाइन चेक बिनै नेपाल प्रवेश गराएको हो ।

फलफूल, तरकारी, खाद्यान्न जस्ता कृषि उपज क्वारेन्टाइन चेक गरेर मात्र नेपाल भित्राउनुपर्ने कानूनी प्रावधान छ । तर कृष्णनगर भन्सारले क्वारेन्टाइन रिपोर्ट बिनै आँप बोकेको ३ वटा ट्रकलाई नेपाल प्रवेश गराएको छ ।

व्यापारीसँगको आर्थिक मिलेमतोमा भन्सारका कर्मचारीले यस्तो गैरकानुनी काम गरेका हुन् । ३ वटा आँप बोकेका गाडी क्वारेन्टाइन चेक बिनै नेपाल प्रबेश गराएका गाडीलाई सीमा सुरक्षार्थ खटिएका सशस्त्र प्रहरीले नियन्त्रणमा लिएका छन् ।

क्वारेन्टाइन रिपोर्ट बिनै नेपाल प्रवेश गरेका तीन वटा आँप बोकेका मिनी ट्रकलाई नियन्त्रणमा लिई कारबाही गरिएको क्वारेन्टाइन कार्यालय कृष्णनगरका प्रमुख बुद्धिराम भट्टराईले बताए ।

उनीहरुलाई डेढ लाख जरिवाना गरिएको उनले बताए । भन्सार हुँदै नेपाल भित्रने सबै सवारीसाधनमा चेकजाँचलाई कडाई गरिएको उनले बताए ।

‘विषादी चेक बिनै नेपाल आउँदै गरेका ट्रकलाई भन्सारले कुन कानून टेकेर नेपाल छिर्न दियो गम्भीर अनुसन्धानको बिषय बनेको छ’भट्टराईले भने- ‘आर्थिक लेनदेनको मिलेमतोविना यसरी क्वारेन्टाइन चेकजांच नगर्नुपर्ने कारण हुँदैन । राजस्व चुहावट बढिरहेकाले कृष्णनगर भन्सारले पछिल्ला बर्ष तोकिएको राजस्व पनि उठाउन सकेको छैन ।’

कृष्णनगर भन्सार कार्यालयका प्रमुख मानबहादुर पौडेलले सबै गाडीहरु जाँचपास गरेर पठाइने गरेको दावी गरे । विषादी चेक बिनै आँप बोकेका ट्रक नेपाल भित्रिएको बारे आफूलाई कुनै जानकारी नभएको उनले जिकिर गरे ।

एउटा प्रज्ञापनपत्रबाट धेरै गाडी आउने हुँदा छुटेको हुनसक्ने उनको तर्क छ ।

– यस समाचारको श्रोत : Online Khabar हो ।