कैलालीमा ४७ ग्राम खैरो हेरोइनसहित ४ जना पक्राउ
८ कात्तिक, धनगढी। कैलालीमा ४७ ग्राम लागुऔषध खैरो हेरोईनसहित चार जनालाई पक्राउ गरिएको छ ।
बुधबार टीकापुर नगरपालिका–२ बिजयनगर बस्ने २३ वर्षीय मखन चौधरीलाई ५० मिलिग्राम लागुऔषध खैरो हेरोईनसहित पक्राउ गरिएको थियो ।
तर चौधरीको घरमा चेकजाँच गर्दा थप ४३ ग्राम खैरो हेरोईन बरामद गरिएको जिल्ला प्रहरी कार्यालयका सहप्रवक्ता दर्शन खड्काले जानकारी दिए ।
उनका अनुसार चौधरीसँगै अन्य तीन जनालाई समेत लागुऔषधसहित पक्राउ गरिएको छ ।
ईलाका प्रहरी कार्यालय मालाखेतीको टोलीले गोदावरी नगरपालिका–१ अत्तरियाबाट चुरे गाउँपालिका–३ बस्ने २१ वर्षीय निराजन शाहलाई पक्राउ गरेको छ ।
उनको साथबाट एक ग्राम २३० मिलिग्राम लागुऔषध खैरो हेरोईन बरामद गरिएको छ ।
यस्तै, धनगढीबाट बैतडी जान लागेको सुपप्र०१००१ज१४३४ नम्बरको जिपमा सवार डोटीको जोरायल गाउँपालिका–२ भट्टेखोला बस्ने २४ वर्षीय दिपक बिष्ट र २४ वर्षीय गोबिन्द बिष्टलाई पनि पक्राउ गरिएको छ ।
अस्थायी प्रहरी पोष्ट खानिडाँडाको टोलीले चेकजाँच गर्दा दिपकको गोजीबाट कालो पोलिथिनमा बाधेको दुई ग्राम ७९० मिलिग्राम लागुऔषध(खैरो हेरोईन) बरामद गरिएको प्रहरी निरीक्षक खड्काले बताए ।
लागुऔषध खैरो हेरोईनसहित पक्राउ परेका चारै जनालाई नियन्त्रणमा राखेर अनुसन्धान भइरहेको प्रहरीले जनाएको छ ।
– यस समाचारको श्रोत : Online Khabar हो ।