वर्ल्ड ट्रायथलनकी अध्यक्ष कासाडो नेपालमा
१३ वैशाख, काठमाडौं । वर्ल्ड ट्रायथलनकी अध्यक्ष मारिसोल कासाडो ३ दिने नेपाल भ्रमणका क्रममा बिहीबार काठमाडौं आइपुगेकी छिन् । नेपालमा पछिल्लो समय ट्रायथलनको विकास र विस्तारले प्रभावित कासाडो सद्भावना भ्रमणका लागि नेपाल आएकी हुन् ।
यसक्रममा उनी पोखरा जानेछिन् । पोखरामा शनिबार २०२४ एसियन कप एन्ड साउथ एसियन ट्रायथलन च्याम्पिनयसप हुँदैछ । यसमा १५ देशका ६५ भन्दा बढी खेलाडीको सहभागिता रहनेछ र यो वर्ल्ड ट्रायथलनको मान्यता प्राप्त आधिकारिक प्रतियोगिता रहेको छ ।
नेपालले सन् २०१५ देखि साउथ एसियन ट्रायथलन र सन् २०१९ देखि एसिया ट्रायथलन कपको आयोजना गर्दै आएको छ । वर्ल्ड ट्रायथलनका महासचिव आन्टोनियो अरमानी पनि नेपाल आउने कार्यक्रम रहेको छ र उनी शुक्रबार काठमाडौं आइपुग्नेछन् ।
नेपाल ओलम्पिक कमिटीका महासचिव तथा नेपाल ट्रायथलन संघका अध्यक्ष निलेन्द्रराज श्रेष्ठले अध्यक्ष कासाडोको त्रिभुवन अन्तर्राष्ट्रिय विमान स्थलमा स्वागत गरेका थिए । वर्ल्ड ट्रायथलनको मुख्यालय स्विटजरल्यान्डको लुसानमा रहेको छ ।
– यस समाचारको श्रोत : Online Khabar हो ।