नाजिर हुसेन अभिनित ‘गुन्युचोलो’ अमेरिकाको तस्वीर फिल्म मार्केटमा छनोट

काठमाडौं । नाजिर हुसेन अभिनित नेपाली फिल्म ‘गुन्युचोलो’ अमेरिकाको प्रतिष्ठित तस्वीर फिल्म मार्केटमा छनोट भएको छ । यो फिल्मसहित अमेरिकी र भारतीय प्रोजेक्ट पनि मार्केटमा छानिएका छन् ।

अमिताभ बच्चन र दिवंगत अभिनेता इरफानका छोरा बबिलको फिल्म ‘द उमेश क्रोनिकल्स’ पनि छनोट भएको छ । अमेरिकाको सियाटलमा आयोजना हुने तस्वीर फिल्म फेस्टिभलले यसवर्षदेखि फिल्म मार्केट पनि सुरु गर्दैछ ।

अमेरिकी डायस्पोराका दक्षिण एसियाली फिल्म निर्माता र सर्जकलाई लक्षित गर्दै फिल्म मार्केट थालिएको तस्वीर फिल्म फेस्टिभलले जनाएको छ । फेस्टिभल संस्थापक र निर्देशक रीता मेहरले मार्केटको थालनी भएकोमा खुसी व्यक्त गरिन् ।

‘लामो समयपछि दक्षिण एसियाली फिल्म लक्षित फिल्म बजार सुरु हुँदैछ । यो फिल्म फेस्टिभल अस्करयोग्य दक्षिण एसियाली फिल्म फेस्टिभल भएकाले तस्वीर फिल्म मार्केटले फिल्म निर्मातालाई आवश्यक स्रोत सुरक्षित गर्न मद्दत गर्छ’ मेहरले भनेकी छन् ।

पहिलो तस्वीर फिल्म मार्केट अक्टोबर १५ देखि १८ सम्म आयोजना हुँदैछ । मार्केटमा अमेजन एमजीएम स्टुडियो, पिलर्स फण्ड, ब्लमहाउस एचबीओ, सीएए, क्रिएटिभ ल्याण्ड स्टुडियो लगायतका फिल्म संस्था पनि सहभागि हुने जनाइएको छ ।

‘गुन्यु चोलो’लाई समुन्द्र भट्टले निर्देशन गरेकी हुन् । यो फिल्मको अन्तर्राष्ट्रिय वितरण अधिकार अमेरिकाको बफेलो एट्ले खरिद गरेको छ । यो फिल्मलाई फेस्टिभल सर्किटपछि नेपालमा प्रदर्शन गरिने निर्देशक भट्टले जानकारी दिइन् ।

फिल्ममा नाजिरले पारालैंगिक महिला (ट्रान्सवुमन)को भूमिका निर्वाह गरेका छन् । फिल्ममा नाजिरसँगै सञ्चिता लुइँटेल, सुशिल सिटौला, राजकुमार घोष, शिशिर राणा, अनुपम श्रेष्ठ, विशाल पहारीको पनि अभिनय छ । पुष्कर लामा निर्माण नियन्त्रक हुन् । ‘आधा पेज’पछि भट्टको यो दोस्रो निर्देशकीय फिचर हो ।

– यस समाचारको श्रोत : Online Khabar हो ।