Main

को हुन् पहिलो पटक नेपाली टिममा पर्ने हेमन्त, आकाश र रिजन ?

२१ माघ, काठमाडौं । नेपालले घरेलु मैदानमा क्यानडासँग खेल्ने तीन ओडीआई सिरिज र आईसीसी विश्वकप लिग २ मा नामिबिया र नेदरल्यान्ड्ससँग खेल्ने त्रिकोणात्मक सिरिजको लागि अलग-अलग टोली घोषणा गरेको छ ।

बायाँ हाते तीव्र गतिका बलर रिजन ढकाल दुबै सिरिजमा टोलीमा परेका छन् । तीव्र गतिका बलर हेमन्त धामी र आकाश चन्द क्यानडासँगको सिरिजमा नेपालको टोलीमा परेका छन् । रिजन, आकाश र हेमन्त पहिलो पटक नेपाली क्रिकेट टोलीमा परेका हुन् ।

यसअघि बायाँ हाते तीव्र गतिका बलरको रुपमा टोलीमा रहँदै आएका प्रतिश जि.सीलाई टोलीबाट बाहिर राख्दै रिजनलाई मौका दिएको हो ।

यसअघि कहिल्यै बन्द प्रशिक्षणमा नपरेका यी तीन खेलाडी सिधैं नेपालको अन्तिम टोलीमा परेका हुन् ।

क्यानडासँगको सिरिज ८ देखि १२ फेब्रुअरीमा हुनेछ । लिग २ मा नेपालले १५ फेब्रुअरी देखि २४ सम्म खेल्नेछ । क्यानडासँग नेपालले फेब्रुअरी ८, १० र १२ मा खेल्ने तालिका छ ।

पहिलो पटक नेपालको टोलीमा परेका तीन खेलाडी

रिजन ढकाल

बागमती प्रदेशका तीव्र गतिका बलर रिजन ढकालले प्रधानमन्त्री कप एकदिवसीय राष्ट्रिय प्रतियोगितामा राम्रो प्रदर्शन गर्दै टोलीमा स्थान बनाएका हुन् । बायाँ हाते बलर हुँदा रिजनलाई नेपालले टोलीमा स्थान बनाउन थप सहज भएको हो ।

उनले पछिल्लो समय घरेलु क्रिकेटमा राम्रो प्रदर्शन गर्दै आएका छन् । उनले प्रधानमन्त्री कपमा ९ खेलमा १५ विकेट लिएका थिए ।

आकाश चन्द

तीव्र गतिका बलर आकाश चन्दले दक्षिण अफ्रिकामा जारी आईसीसी यू-१९ विश्वकप क्रिकेटमा उत्कृष्ट प्रभाव छाडेपछि क्यानडाविरुद्ध खेल्ने मौका पाएका हुन् । उनले सुपर सिक्समा अफगानिस्तानलाई १ विकेटले हराउन पाँच विकेट लिएका थिए । त्यसअघि पाकिस्तानविरुद्ध ३ विकेट लिएका थिए ।

गत वर्ष युएईमा सम्पन्न विश्वकप छनोट २०२३ एसियामा ४ खेलमा ११ विकेट लिंदै विश्वकपमा स्थान पक्का गरेका थिए ।

जसक्रममा उनले कुवेतविरुद्ध ६ विकेट लिएका थिए । त्यसपछि उनले नेपाललाई एसीसी यू-१९ प्रिमियर कपको उपाधि दिलाउन २०२३ मा ८ विकेट लिंदै राम्रो प्रदर्शन गरेका थिए ।

त्रिभुवन आर्मी क्लबबाट घरेलु क्रिकेट खेल्ने उनले यू-१९ मा राम्रो प्रदर्शन गरेपछि क्यानडाविरुद्ध खेल्ने मौका पाएका हुन् ।

हेमन्त धामी

हेमन्त धामीले चोटका कारण यू-१९ विश्वकप क्रिकेट गुमाएका थिए । तर उनी इनस्विङ्ग र गतिका लागि चिनिन्छन् ।

सुदूरपश्चिमबाट घरेलु क्रिकेट खेल्ने उनले नेपालबाट पछिल्लो एक वर्षमा यू-१९ क्रिकेटमा उत्कृष्ट प्रदर्शन गर्दै आएका छन् ।

गत डिसेम्बरमा सम्पन्न यू-१९ एसिया कपमा हेमन्तले अफगानिस्तानविरुद्ध दुई विकेट लिएका थिए । गतवर्ष युएईमा नेपाललाई यू-१९ विश्वकप क्रिकेटमा पुर्‍याउन पनि शानदार प्रदर्शन गरेका थिए ।

– यस समाचारको श्रोत : Online Khabar हो ।

Related Articles

Back to top button