‘गाउँ आएको बाटो’ प्रिमियरको लागि इटालीबाट आइन् संगीतकार ली
काठमाडौं । फिल्म ‘गाउँ आएको बाटो’को नेपाल प्रिमियरमा सहभागि हुन संगीतकार हाइडी ली काठमाडौं आइपुगेकी छन् । ली इटालीबाट सोमबार नेपाल आइपुगेको फिल्मका सहायक निर्माता मिन्सो लिम्बुले जानकारी दिए ।
यो फिल्ममा लीले ३० वटा जति सांगीतिक टुक्रामा संगीत दिएको लिम्बुले जानकारी दिए । फिल्मको शीर्ष गीत ‘आलाङ्ने’ पनि लीकै कम्पोजमा बनेको हो जसमा राजेशपायल राईको स्वर समावेश छ ।
उक्त गीतलाई गाउन आफूलाई ६ घण्टा समय लागेको खुलासा राजेशपायलले यसअघि गरिसकेका छन् । ‘मेरो करिअरकै सबैभन्दा लामो गीतको रुपमा मैले यसलाई लिएको छु’ उनले भनेका थिए ।
संगीतकार लीको यो दोस्रो नेपाल भ्रमण हो । यसअघि गीतको रेकर्ड गर्ने क्रममा उनी आएकी थिइन् । ‘फेस्टिभलपछि अब नेपालका हलमा रिलिज हुँदैछ । थिएट्रिकल रिलिजलाई लिएर उत्साहित छु’ लीले फोनमा अनलाइनखबरसँग भनिन् ।
सहायक निर्माता लिम्बुका अनुसार बुधबार बिग मूभिजमा हुने प्रिमियर राई संस्कृतिको थिममा हुँदैछ । योे फिल्मलाई नेपालको पहिलो राई फिल्म समेत रहेको बताइएको छ । फिल्मलाई नवीन सुब्बाले निर्देशन गरेका हुन् ।
गाउँमा सडक पुगेपछि त्यसले ल्याउने सामाजिक, आर्थिक र पारिवारिक उतारचढावको कथामा फिल्म बनेको छ ।
– यस समाचारको श्रोत : Online Khabar हो ।