साम्तेन भुटियाको फिल्म ‘तारा’ कान्सको ‘मार्केट स्क्रिनिङ’मा छनोट
काठमाडौं । साम्तेन भुटिया निर्देशित फिल्म ‘तारा : द लस्ट स्टार’ कान्स फिल्म फेस्टिभलको मार्केट स्क्रिनिङका लागि छनोट भएको छ । निर्देशक भुटियाले आफू निर्देशित फिल्म कान्सको ‘मार्चे दु फिल्म’ विधामा छनोट भएको जनाएका छन् ।
सावित्री क्षेत्रीले निर्माण गरेको यो फिल्मलाई सदा प्रोडक्सन र पासाङ मिनटोक फिल्म्सको ब्यानरमा निर्माण गरिएको हो । नेपाली भाषाको यो फिचर फिल्मलाई हिमालय र सिक्किमको संस्कृतिक झल्काउने आँखीझ्याल बताइएको छ ।
फिल्ममा श्यामश्री शेर्पा, किरण दाहाल, दियोराज शेर्पा, लुनिभा तुलाधर, शशीकला प्रधान, सुस्मिता भुजेल, बसन्त शर्मा, आनन्द गुरुङ र तिमोथी राईको अभिनय छ । निर्देशक भुटियाले नेपाली फिल्मलाई विश्व मंचमा लैजाने प्रयासमा यो महत्वपूर्ण उपलब्धि भएको बताएका छन् ।
सिक्किमका मुख्यमन्त्री प्रेमसिंह तामाङले सामाजिक संजाल एक्समार्फत निर्मातालाई बधाई दिएका छन् ।
उनी लेख्छन्- यस सोसल ड्रामाले हिमालयको जीवन्त संस्कृति र कथा देखाउँदै विश्वव्यापी दर्शकलाई मोहित गर्ने वाचा गर्दछ यो हाम्रा फिल्म निर्माताको प्रतिभा र समर्पणको प्रमाण हो, जसले कान्सको मञ्चमा सिक्किमको रचनात्मक भावनालाई उज्यालो पारेको छ । यसवर्षको कान्स फिल्म फेस्टिभल मे १४ देखि २५ सम्म आयोजना हुँदैछ ।
– यस समाचारको श्रोत : Online Khabar हो ।