गीतकार मनोज खड्काले ल्याए रामकृष्ण ढकालको स्वरमा ‘जीवनको हिसाब’

गाउँघरले सोध्यो परदेशीलाई

फर्किन्छौ या उतै भासिन्छौ भाइ

जीवनको हिसाब मिलेन साथी

सपनामा लडें गुम्सियो छाती

गीतकार मनोज खड्काको नयाँ गीत ‘जीवनको हिसाब’का शब्द हुन् यी । नेपाली समाजको साझा कथा बोल्ने यो गीतमा रामकृष्ण ढकालको स्वर र डेनी निरौलाको संगीत छ । गीतलाई किरण कँडेलले एरेन्ज गरेका हुन् ।

घरको कमजोर आर्थिक अवस्थालाई उकास्ने सपना बोकेर बिरामी बुवा, आमा र श्रीमतीलाई घरमा छाडेर परदेशिन बाध्य युवकको कथा गीतको भिडियोमा प्रस्तुत छ । धनेन्द्र रसाइलीले निर्देशन गरेको भिडियोमा अभिनेता दिलीप रायमाझी र सविना थपलिया फिचर्ड छन् । भिडियोमा मनोज खड्का, सागर कालीकोटे, मंगल विश्व, अञ्जान भुटानी, धनमाया गजमेर, सोम बराइली, टेभोन बाउर्स र डेभोन कोटिट समेत देखिएका छन् ।

परदेशिएका नेपालीहरूको भौतिक र मानसिक अवस्थालाई भिडियोमा उतारिएको गीतमा बन्दूक आतंकलाई समेत प्रस्तुत गरिएको छ । गीतमार्फत परिवार र समाजसँग बिछोडिएका नेपाली चाँडै जन्मभूमि फर्केर पुनर्मिलनको वातावरण बनोस् भन्ने आग्रह गरिएको छ ।

अस्ट्रेलियाको सिड्नीमा शनिबार आयोजित रामकृष्ण ढकालको सांगीतिक कार्यक्रमका क्रममा ‘जीवनको हिसाब’ गीत सार्वजनिक गरिएको हो । भिडियोमा राजेन्द्र विष्टको छायांकन र सुक कालीकोटेको प्रोडक्सन डिजाइन छ । भिडियोको पोस्ट प्रोडक्सन ड्रागन प्रोडक्सनमा गरिएको छ भने प्रकाशन संयोजन नेपाल म्युजिक एसोसिएसनका अध्यक्ष तथा साधना कला केन्द्रका संस्थापक मिलन मोक्तानले गरेका छन् ।

गीतकार खड्का हाल अमेरिकी अन्तर्राष्ट्रिय नियोग यूएसएडको मुख्यालय वासिङ्टन डीसीमा कार्यरत छन् । खड्काले नेपालको हरेक परिवारका कोही न कोही सदस्य विदेशमा रहेकाले सम्बन्धित व्यक्ति तथा परिवारका लागि गीतले छुने बताए ।  करिब एक दर्जन हाराहारीमा गीत रेकर्ड गराइसकेका गीतकार खड्काको पछिल्लो ‘तिमी जे बन उदाहरण बन’ सार्वजनिक भएको थियो ।

‘जीवनको हिसाब’ ‘ओएसआर डिजिटल’ युट्युब च्यानलमा रिलिज गरिएको छ ।



– यस समाचारको श्रोत : Online Khabar हो ।