गुल्मीका दशैं मेलामा जेरी व्यापार

३० असोज, गुल्मी । गुल्मी जिल्लामा दशैंको छेको पारेर विभिन्न ठाउँमा मेला महोत्सव हुँदै आएको छ । अधिकांश ती मेला महोत्सवमा जेरीको राम्रो व्यापार हुने गरेको छ ।

दशैं पछिको मन्दमन्द चिसोमा तातो जेरीको चुस्की लिँदै सराय मेला अवलोकन गर्ने गर्दछन् । दशैं सकिएपछि एकदशी देखि पूर्णिमासम्म विभिन्न स्थानहरुमा मेला लाग्ने गर्दछ ।

जिल्लाका विभिन्न स्थलहरुमा चल्ने मेलाहरुमा पुगेपछि सबैको पहिलो रोजाइ नै जेरी पर्ने गरेको छ । मेला भर्न गएकाहरुले पनि साँझमा घर फर्किंदा जेरी लैजाने गर्नाले यो बेला जेरी पकाउनेहरुको व्यवसाय राम्रो हुने गरेको बताउँछन् ।

दशैंपछि गुल्मी जिल्लाको पहिचानको रुपमा रहेको सराय नाच देखाउने गरिन्छ । सराय नाच देखाउने स्थलहरुमा प्रायजसो जेरीका पसलहरु मात्रै राखिने गरिन्छ । यो बेला अन्य समयमा भन्दा धेरै बिक्ने गरेको मालिका गाउँपालिकाका देवीराम पन्थीले बताए ।

उनले दशैंपछि मालिका क्षेत्रमा पर्ने विभिन्न मेलाहरुमा पुगेर दैनिक ५० केजी भन्दा बढी जेरीको व्यापार हुने गरेको बताए । पन्थी जस्तै जेरी बेच्नेहरु धेरै छन् । जुन दशैंको बेलामा जेरीको मात्रै व्यापार गर्ने गर्दछन् ।

दशैंमा मात्रै जेरी बेचेर राम्रो आम्दानी हुने पन्थी बताउँछन् । अहिले जेरी प्रतिकेजी मूल्य ५ सय रुपैयाँमा बिक्री हुने गरेको छ । व्यवसायीहरुले प्रतिगोटा १५ र २० रुपैयाँसम्ममा बेच्ने गरेको बताउँछन् ।

परापूर्वकालदेखि नाच्न थालिएको सराय मेलाले विभिन्न समयमा घरबाट टाढा भएकाहरु दशैंको बेला घरमा आएकाले साथीसंगीहरुसँग भेटने गतिलो अवसरको रुपमा पनि लिइन्छ । अहिले दशैंले रिक्तीएका गाउँ बस्तीहरु पनि भरिभराउ भएका छन् ।

पहिलेदेखि नै एकदमै राम्रो सरायनाच हुने स्थलहरु घमिर, अर्जे, अम्मरपुर, इस्मामैदान, धुर्कोट, मुसिकोट, ताल्तुङ, धागिथुम, जोगिथुम, चोयगा, उनायचौर लगाएत झण्डै २ दर्जन स्थानहरुमा चल्ने मेलाहरुमा मुख्य आकर्षण जेरी नै पर्ने गर्दछ ।

फरक ठाउँमा फरक समयमा मेलाहरु लाग्ने गरेकाले ती स्थानहरुमा धेरै ठाउँमा एकै व्यक्तिहरु पनि पुग्ने गर्दछन् । मेलाहरुमा अरुभन्दा जेरी नै मुख्य विशेषता र आकर्षण हुनेभएकाले व्यवसाय पनि राम्रो भएकाले जेरी पकाउने गरेको बताउँछन् ।

– यस समाचारको श्रोत : Online Khabar हो ।