गोरखा नगरपालिका–५ को वडाध्यक्ष कसले जित्ला ?

२ मंसिर, गोरखा । १६ मंसिरमा गोरखा नगरपालिका–५ मा हुने उपनिर्वाचनका लागि १० जनाको उम्मेदवारी परेको छ । आइतबार मुख्य निर्वाचन अधिकृतको कार्यालय पुगेर उनीहरुले मनोनयन दर्ता गरेका हुन् ।

नेपाली कांग्रेसबाट भाइकाजी आले, नेकपा एमालेबाट दुर्गा माया थापा राना र नेकपा माओवादी केन्द्रबाट बिष्णुबहादुर मगरले उम्मेदवारी दर्ता गराएका छन् ।

एकीकृत समाजवादीबाट खङ्गबहादुर भुजेल, राष्ट्रिय स्वतन्त्र पार्टीबाट मंगलबहादुर थापा, राष्ट्रिय प्रजातन्त्र पार्टीबाट कल्पना राना, नेपाल समाजवादी पार्टीबाट रुपेश मग्राती र राष्ट्रिय प्रजातन्त्र पार्टी नेपालबाट रुप सिंह रानाको उम्मेदवारी परेको मुख्य निर्वाचन अधिकृत शिवबहादुर रानाभाटले बताए ।

त्यस्तै मंगोल नेशनल अर्गनाइजेसनबाट भवानी थापा मगर र नेशनल रिपब्लिक नेपालबाट सविना तामाङले पनि मनोनयन दर्ता गराएका छन् ।
अब ४ मंसिरमा उम्मेदवारको नामावली प्रकाशन गर्ने र ५ मंसिरको दिउँसो एक बजेसम्म उम्मेदवारको नाम फिर्ता गर्न सकिने जिल्ला निर्वाचन अधिकृत टेकबहादुर कोइरालाले बताए ।

कसले मार्ला बाजी ?

निर्वाचनमा बिशेषत प्रमुख तीन दल (कांग्रेस, एमाले र माओवादी) बीच प्रतिस्पर्धा हुने देखिन्छ । २०७४ सालको स्थानीय तह निर्वाचनमा उक्त वडा कांग्रेसले जितेको थियो । माओवादी दोस्रो बनेको थियो भने एमाले तेस्रो ।

२०७९ को स्थानीय तह निर्वाचनमा कांग्रेसलाई हराउँदै एमालेका उम्मेदवार खिलबहादुर राना विजयी भएका थिए । २६ मतान्तरले हारेर कांग्रेस दोस्रो बनेको थियो भने माओवादी तेस्रो बनेको थियो ।

सांगठनिक रुपमा बलियो भएका कारण पनि आफूहरुको जित्नेमा कांग्रेस विश्वस्त छ । ‘२०७९ को चुनावमा पनि हामीले जित्ने वडा हो, तर केही आन्तरिक त्रुटिले गर्दा झिनो मतले हार्नुपर्‍यो’, पार्टी जिल्ला सचिव किशोरजंग थापाले भने, ‘अहिले सबै सुधार भइसक्यो, हाम्रो जित पक्का छ ।’

स्थानीय स्तरबाटै सर्वसम्मत रुपमा उम्मेदवार छनोट भएको र विभिन्न संघसंस्थामा आवद्ध रही सामाजिक काममा सक्रिय व्यक्ति उम्मेदवार रहेकाले आफूहरुले जित्ने सचिव थापाले बताए ।

एमालेले पनि आफ्नो उम्मेदवारको जित पक्का हुने दावी गर्दै आएको छ । यसअघिका अध्यक्ष खिलबहादुर रानाको योजना पूरा गर्न वडावासीले एमालेलाई नै निर्वाचित गर्ने विश्वास रहेको जिल्ला सचिव काजीराम रोका बताउँछन् ।

‘वडाको विकास र समृद्धिका लागि रानाले निर्वाह गर्नु भएको भूमिका र उहाँको अधुरो कामलाई पूरा गर्न पनि एमालेको अपेक्षा गरेको बुझिन्छ’, उनले भने ।

एमालेले अहिले खिलबहादुरकै पत्नी दुर्गामायालाई उम्मेदवार बनाएको छ ।

माओवादी केन्द्रले पनि आफ्नो उम्मेदवार कमजोर नरहेको बताउँदै आएको छ ।

पार्टीका वैकल्पिक केन्द्रीय सदस्य लेखबहादुर थापाले भने, ‘हामीले छनोट गरेको उम्मेदवार विभिन्न संघसंस्थामा आवद्ध रहेर सामाजिक कार्यमा अग्रसर हुनुहुन्छ र वौद्धिक व्यक्तित्वको रुपमा पनि परिचित भएकाले पनि जित सहज छ ।’ झिनो मतान्तरले भएपनि आफूहरु विजयी हुने उनले जिकिर गरे ।

यसअघिका वडाध्यक्ष खिलबहादुर रानाको २०७९ साल कात्तिक १० गते भाइटीकाको दिन निधन भएको थियो ।

– यस समाचारको श्रोत : Online Khabar हो ।