अमेरिकाले हामीलाई अभूतपूर्व र शक्तिशाली जनादेश दिएको छः ट्रम्प
२१ कात्तिक, काठमाडौं । रिपब्लिकन पार्टीबाट अमेरिकी राष्ट्रपतिका उम्मेदवार डोनाल्ड ट्रम्पले फ्लोरिडामा आफ्नो चुनावी अभियानको मुख्यालयमा उपस्थित नागरिकलाई सम्बोधन गरेका छन् ।
चुनावी नतिजा आफ्नो पक्षमा आउने सम्भावना निकै बलियो भएपछि ट्रम्प आफ्ना समर्थकलाई सम्बोधन गर्न फ्लोरिडा पुगेका हुन् ।
मतदातालाई सम्बोधन गर्दै ट्रम्पले आजको दिनलाई आफ्नो जीवनको सबैभन्दा महत्वपूर्ण दिनको रूपमा सम्झने विश्वास व्यक्त गरेका छन् । उनले आफ्नो चार वर्षे कार्यकाल अमेरिकाका लागि स्वर्ण युग (गोल्डेन एज) हुने दाबी गरे ।
‘यो अमेरिकाको लागि स्वर्ण युग हुनेछ’ उनले भने, ‘यो अमेरिकी जनताको लागि ठूलो विजय हो जसले हामीलाई अमेरिकालाई फेरि महान बनाउन सक्षम बनाउँछ। अमेरिकाले हामीलाई अभूतपूर्व र शक्तिशाली जनादेश दिएको छ ।’
रिपब्लिकन पार्टीले दुवै सदनमा सम्भावित जितलाई संकेत गर्दै उनले उक्त अभिव्यक्ति दिएका हुन् ।
ट्रम्पले आफ्ना मतदातालाई धन्यवाद दिंदै भने, ‘हामीले त्यो गरेर देखायौं जुन मानिसहरूलाई असम्भव लागिरहेको थियो ।’ उनले सम्बोधनको क्रममा देशको सबै समस्या समाधान गर्ने बताए ।
उनले भने, ‘एकपटक अमेरिका फेरि महान बन्नेछ ।’ उनले अलास्का, नेवादा र एरिजोनामा जित हासिल गर्नु आफ्नो लागि महत्वपूर्ण कुरा भएको बताए ।
‘यो अविश्वसनीय छ । म अमेरिकी नागरिकको परिवार र उनीहरूको भविष्यको लागि लड्नेछु । आउँदो ४ वर्ष अमेरिकाको लागि महत्वपूर्ण छ ।’
श्रीमती मेलानियाका साथै परिवारका सदस्यहरुलाई धन्यवाद दिएका उनले जेडी भान्सलाई उपराष्ट्रपतिका रुपमा प्रस्तुत गरे । भान्सले पनि सम्बोधन गर्दै यो जित ठूलो राजनीतिक पुनरागमन भएको बताए ।
ट्रम्पले एलन मस्कको पनि निकै तारिफ गरे । उनी रिपब्लिकन पार्टीको ‘न्यू स्टार’ भएको बताउँदै ट्रम्पले भने, ‘मस्क वास्तवमै गज्जबका मान्छे हुन् ।’
ट्रम्पले सम्बोधनको क्रममा आफ्नी पत्नी मेलानिया र परिवारलाई धन्यवाद दिए । उनले मेलानियाको पुस्तकको प्रशंसा गर्दै भने, ‘उनले निकै राम्रो गरेकी छन् ।’
सम्बोधनको क्रममा ट्रम्पले आफ्नो जित घोषणा गरेका छन् । यद्यपि यसको औपचारिक घोषणा भने भइसकेको छैन ।
– यस समाचारको श्रोत : Online Khabar हो ।