घलेम्दीको बोलकबोल सेयर नपाउनेलाई आइतबारदेखि पैसा फिर्ता हुने

३ फागुन, काठमाडौं । घलेम्दी हाइड्रोपावरको सेयर खरिदका लागि बोलकबोल प्रक्रियामा सहभागी भएका सर्वसाधारण लगानीकर्ताले आइतबारदेखि पैसा फिर्ता पाउने भएका छन् । बोलकबोल प्रक्रियामा रकम बुझाएका तर सेयर पाउन नसकेकाहरुलाई आइतबारदेखि पैसा फिर्ता हुने बिक्री प्रवन्धक मुक्तिनाथ क्यापिटलले जनाएको छ ।

घलेम्दी हाइड्रोको यसअघि निष्कासन भएको हकप्रद सेयरमा बिक्री नभएको ३२ लाख १७ हजार ७२४ कित्ता सेयर बोलकबोल प्रक्रियाबाट बिक्रीका लागि माघ ९ देखि २३ गतेसम्म आवेदन खुलेको थियो । फागुन २ गते सो बोलकबोल प्रक्रियाबाट खुलाइएको सेयर बाँडफाँट भएको थियो । बाँडफाँटका क्रममा कटअफ मूल्य १५१ रुपैयाँ ३५ पैसा निर्धारण भएको थियो ।

प्रतिकित्ता १५१ रुपैयाँ ३५ पैसाभन्दा माथि मूल्य तोकेर आवेदन दिएका सबैले सेयर पाउने भएका छन् । सोभन्दा तलको मूल्य तोकेर आवेदन दिएकाहरुले भने आइतबारदेखि आफ्नो बैंक खातामै पैसा फिर्ता पाउने क्यापिटलले जनाएको छ । हाल यस कम्पनीको सेयर मूल्य प्रतिकित्ता १८० रुपैयाँ १० पैसा छ ।

– यस समाचारको श्रोत : Online Khabar हो ।