चिकित्सक संघले राष्ट्रिय स्वास्थ्य सम्मेलन गर्दै

काठमाडौं । नेपाल चिकित्सक संघको आयोजनामा आगामी २८ र २९ मंसिरमा काठमाडौंमा चौथो राष्ट्रिय स्वास्थ्य सम्मेलन हुने भएको छ । बबरमहलस्थित कार्की ब्याङ्केटमा हुने सम्मेलनको मुख्य थिम ‘हेल्थ बियोन्ड हेल्थ’ राखिएको छ ।

चौथो राष्ट्रिय स्वास्थ्य सम्मेलनका लागि सात विषय तय गरिएका छन् । सम्मेलनमा छलफल हुने विषयहरुमा ‘प्रतिबद्धताबाट कार्यान्वयनसम्मः तेस्रो राष्ट्रिय स्वास्थ्य सम्मेलन घोषणापत्रका प्रगति, चुनौती र अनुभवहरू, परिवर्तनकारी स्वास्थ्य प्रणाली र युनिभर्सल हेल्थ कभरेज, अनुसन्धान, अध्ययन र सहकार्यको क्षमता निर्माण,  स्वास्थ्य संकट र महामारीका लागि पूर्वतयारी,  चिकित्सा शिक्षा सुधार र नवप्रवर्तन,  स्वास्थ्यमा सञ्चार माध्यम, जनचेतना र उत्तरदायी पत्रकारिता  र संक्रामक रोग, व्यावसायिक र वातावरणीय स्वास्थ्यमा पानी, सरसफाइ र पोषणको प्रभाव रहेका छन् ।

सम्मेलनले नेपालको स्वास्थ्य प्रणालीलाई समृद्ध र दिगो बनाउन नीतिगत सुझावहरू प्रस्तुत गर्न मुख्य भूमिका खेल्ने अध्यक्ष डा. अनिलविक्रम कार्कीले बताए ।

‘नेपालमा गुणस्तरीय स्वास्थ्य सेवाको पहुँच अझै पनि चुनौतीपूर्ण रहँदा यसले समग्र जनस्वास्थ्य र सामाजिक कल्याणमा नकारात्मक प्रभाव पार्दै आएको छ’, डा. कार्कीले भने, ‘यस समस्याको समाधान केवल स्वास्थ्य सेवा विस्तारमा सीमित नभई, स्वास्थ्य परिणामलाई प्रभाव पार्ने सामाजिक, वातावरणीय र आर्थिक पक्षहरूलाई समेत समेट्ने गरी व्यापक दृष्टिकोण आवश्यक छ ।’

स्वास्थ्यमा समता, दिगोपन र सेवाग्राही केन्द्रित अभ्यासलाई समेटेर मात्र समावेशी समाज निर्माण गर्न सकिने संघले जिकिर गरेको छ । यी विषयमा बहस र समाधान खोज्न देश–विदेशका विज्ञ, नीति निर्माता, स्वास्थ्यकर्मी, उद्यमीहरूको उपस्थितिमा छलफल गरिने संघले जनाएको छ ।

स्वास्थ्यलाई शिक्षा, आवास, रोजगारी र वातावरण संरक्षण जस्ता सबै क्षेत्रसँग जोडेर एकीकृत नीतिका रूपमा प्रस्तुत गर्दै यस सम्मेलनले नेपालको वर्तमान स्वास्थ्य असमानतालाई सम्बोधन गर्ने, स्वास्थ्य प्रणालीलाई सबल बनाउने र भविष्यका स्वास्थ्यसम्बन्धी आवश्यकताहरूको तयारी गर्ने लक्ष्य राखेको बताइएको छ ।

दुई दिने सम्मेलनमा एक हजार भन्दा बढीको सहभागिता हुने संघको अनुमान छ ।

– यस समाचारको श्रोत : Online Khabar हो ।