चिजको डल्ला समाउन पहाडबाट यसरी पल्टिए सयौं मानिस
बेलायतको ग्लुसेस्टरशायरस्थित कुपर पर्वतमा आयोजना हुने चिजको डल्ला गुडाउने प्रतियोगितामा यो वर्ष पनि विश्वभरका सयौं मानिसहरू लडिबुडी गर्दै चिज समाउन भिरालोमा पल्टिए ।
७ पाउ वजनको उक्त चिजको गोला समाउनका लागि प्रतियोगीहरू उक्त भीरमा चिप्लिंदै, दौडिंदै तथा पल्टिंदै तल झरे । उक्त विशेष चिजको नाम डबल ग्लोसेस्टर हो जुन यसको तिखो तथा मिठो स्वाद र बासनाका लागि लोकप्रिय छ ।
भिरालो पहाडमा दौडिएर तल झर्न सम्भव नहुँदा मानिसहरू लड्दै र पल्टिंदै झर्दा ठक्कर खाएर घाइते हुनु स्वभाविकै हो ।
१८० मिटरको उक्त पहाडबाट झर्दा निकै कम प्रतिस्पर्धीहरु मात्रै सहज रुपमा फेँदीसम्म पुग्न सकेका थिए ।
मास्टर अफ चिजले उक्त विशेष चिज माथिबाट छाडिदिएर तल गुड्न थालेपछि दौड सुरु हुन्छ । त्यसपछि प्रतिस्पर्धीहरू उक्त चिजको डल्लालाई पछ्याउँदै तल झर्छन् ।
यो वर्ष भारी वर्षातपछि उक्त प्रतियोगिता भएकाले पहाड निकै चिप्लो र हिलो थियो । माथिबाट लड्दैपड्दै तल झरेका प्रतिस्पर्धीहरूलाई समाउनका लागि पहाडको फेंदीमा स्थानीय रग्बी क्लबका सदस्यहरू खटिएका थिए ।
उक्त प्रतियोगिताअन्तरर्गत महिलातर्फ नर्थ क्यारोलिनाकी एब्बी ल्याम्पे विजयी भइन् ।
त्यस्तै तिन पुरुष दौडमा स्थानीय जोस शेफर्डसँगै जर्मनी र अष्ट्रेलियाका प्रतिस्पर्धीहरु विजयी बने ।
ग्लोसेस्टरशायरमा सदियौंदेखि चिज पल्टाउने उक्त दौड हुँदै आएको छ । इतिहास अनुसार पहिलोपटक सन् १८२६ मा उक्त प्रतियोगिता भएको हो ।
– यस समाचारको श्रोत : Online Khabar हो ।