नेदरल्यान्ड्सविरुद्ध नेपालको सम्भावित प्लेइङ–११
४ फागुन काठमाडौं । नेपालले आईसीसी क्रिकेट विश्वकप लिग–२ त्रिकोणात्मक सिरिज अन्तर्गत दोस्रो खेलमा शनिबार नेदरल्यान्ड्ससँग खेल्दैछ । खेल बिहान ९:३० मा त्रिवि क्रिकेट मैदानमा सुरु हुनेछ ।
नेपाल पहिलो खेलमा नामिबियासँग ४ विकेटले पराजित भएको थियो । पछिल्लो खेलबाट नेपालले प्लेइङ ११ मा दुई परिवर्तन गर्ने सम्भावना रहन्छ । प्रमुख अलराउन्डर दीपेन्द्रसिंह ऐरी इन्टरनेशल लिग टी–२० क्रिकेट खेलेर युएईबाट शुक्रबार साँझ फर्किएको हुँदा प्लेइङ ११ मा स्थान पक्का देखिन्छ ।
दीपेन्द्र फर्किदा उनको स्थानमा खेल्दै आएका अर्का स्पिन अलराउन्डर पवन सर्राफ बाहिर हुने सम्भावना बढी छ । क्यानडाविरुद्ध तीन सिरिज र नामिवियाविरुद्ध मौका पाए पनि पवनले खासै राम्रो गर्न सकेका थिएनन् । नामिबियासँग उनी १२ रनमा आउट भएका थिए ।
आरिफ शेख टोलीमा फर्किने सम्भावना छ । उनी फर्किदा भाइ आसिफ वा तीव्र गतिका बलर गुल्शन झा मध्य एक बेञ्चमा बस्नुपर्ने हुन्छ । नामिबियाविरुद्ध खराब सट खेल्दै ४ रनमा आउट भएको हुँदा आसिफ बाहिर हुने सम्भावना बढी रहन्छ ।
पछिल्लो समय आसिफको लय पनि त्यति राम्रो छैन । उनी क्यानडासँग ८ र १० रनमा आउट भएका थिए । गुल्शनसँग बलिङ विकल्प हुन्छ ।
आरिफ ओडीआईका भरपर्दा ब्याटर हुन् । यदि खराब सुरुवात गरि हाले मध्यक्रममा सम्हाल्ने ब्याटर चाहिन्छ । त्यसैले नेपालले भाइलाई बेञ्चमा राखेर आरिफलाई खेलाउन सक्छ ।
नेपालको ओपनिङ अनिल र कुशल भुर्तेलले गर्ने सम्भावना छ । यी दुई ओपनरले राम्रो सुरुवात दिलाउन आवश्यक छ । भीम सार्की तेस्रो, रोहित पौडेल चौथो र कुशल मल्ल पाँचौं नम्बरमा खेल्ने सम्भावना देखिन्छ ।
रोहित र भीम ओडीआईका प्रमुख खेलाडी हुन् । जिम्मेवारी इनिङ खेल्न आवश्यक छ । दुबै खेलाडीको सट बल कमजोरीको रुपमा छ । नेदरल्यान्ड्सका बलरले यो कमजोरीमा ध्यान दिनेछन् । गत जुनमा विश्वकप छनोटमा सट बल खेल्न नसक्दा नेदरल्यान्ड्सँग नेपाल १६७ रनमा अल आउट भएको थियो ।
नेपालको योगफल शीर्ष पाँच ब्याटरको प्रदर्शनमा निर्भर हुने देखिन्छ । शीर्ष पाँच मध्य एक ब्याटरको ठूलो इनिङ बिना जित निकै कठिन बन्नेछ ।
छैटौं नम्बरमा आरिफ, सातौंमा दीपेन्द्र, आठौंमा गुल्शन झाको सम्भावना छ । आरिफले इनिङ विकास र अन्त्यले टोलीको अवस्था अनुसार खेल्नुपर्ने हुन्छ । आरिफ ओडीआईका नेपालका भरपर्दा ब्याटर समेत हुन् । नवौं नम्बरमा सोमपाल र दशौं नम्बरमा करण केसी खेल्ने सम्भावना छ ।
रोहितपछि मुख्य प्रशिक्षक मोन्टी देशाईले टोलीको अवस्था हेरि ब्याटिङक्रम तलमाथि गराउन सक्छन् । खराब वा राम्रो सुरुवातमा तलमाथि हुनसक्ने सम्भावना बढी रहन्छ ।
अन्तिम नम्बरमा ललित हुनेछन् । ललित बाहेक अन्य सबै खेलाडीले ब्याटिङको क्षमता राख्छन् । जिम्मेवारी र धैर्यता देखाउन आवश्यक पर्दछ ।
दीपेन्द्र र ललित प्रमुख स्पिनर हुन् । रोहित र कुशल मल्लले पनि साथ दिनेछन् । तीव्र गतिमा सोमपाल कामी र करण केसी हुनेछन् । गुल्शन पार्टटाइममा तीव्र गतिको विकल्प हुनेछन् ।
नेपालको सम्भावित प्लेइङ–११
कुशल भुर्तेल, अनिल साह (विकेटकिपर), भीम सार्की, रोहित पौडेल (कप्तान), कुशल मल्ल, आरिफ शेख, दीपेन्द्रसिंह ऐरी, गुल्शन झा, सोमपाल कामी, करण केसी र ललित राजवंशी ।
– यस समाचारको श्रोत : Online Khabar हो ।