चेसमा लुम्बिनी र बागमती च्याम्पियन
३१ जेठ, पोखरा । प्रथम यू–१५ विद्यालय खेलकुद अन्तर्गत बुद्धिचालको खुलातर्फ टिम इभेन्टको छात्रमा लुम्बिनी तथा छात्रामा बागमती पहिलो भएका छन् ।
लुम्बिनी प्रदेशले सात चरणको खेलमा शत प्रतिशत जितसहित १४ अंक जोड्यो । बाग्मती ११ अंकसहित दोस्रो तथा सुदूरपश्चिम ९ अंकसहित तेस्रो भए । लुम्बिनीको टोलीमा किरण भण्डारी, टोपलाल अधिकारी, सुशान्त अर्याल र आरुष नाग थिए ।
छात्रातर्फ बागमतीले शत प्रतिशत जितसहित पहिलो स्थान हात पार्यो । बागमतीको जीतमा रिया श्रेष्ठको प्रेरणादायी प्रदर्शन सफल भएको थियो ।
यसै महिना सम्पन्न नवौं राष्ट्रिय महिला च्याम्पियनसिपमा पाँचौं स्थान हात पारेकी रियाले यस प्रतियोगितामा शत प्रतिशत स्कोर गरेकी हुन् । लुम्बिनीले चौथो चरणमा बागमतीसँग १–३ ले पराजित हुनुबाहेक अन्य खेलमा हार सहनु परेको थिएन ।
बागमतीको टोलीमा रियाको अलावा राष्ट्रिय च्याम्पियनसिपको अनुभव बटुलीसकेकी श्रीषा दुवाल पनि समावेश थिइन् । अन्य खेलाडीमा एन्जल महर्जन र प्रकृति राई थिए । टोलीको प्रशिक्षण दुई पटकका राष्ट्रिय च्याम्पियन तथा फिडे ट्रेनर केशव श्रेष्ठले गरेका थिए ।
– यस समाचारको श्रोत : Online Khabar हो ।