मिथुन चक्रवर्तीका छोरा मिमोले काठमाडौंमा फिल्मको प्रबर्द्धन गर्ने

काठमाडौं । बलिउड सुपरस्टार मिथुन चक्रवर्तीका छोरा तथा अभिनेता महाक्षय चक्रवर्ती (मिमो) आफू अभिनित पछिल्लो हिन्दी फिल्मको प्रबर्द्धनको लागि नेपाल आउने भएका छन् ।

काठमाडौंमा उनले बलिउड हरर-कमेडी ड्रामा ‘ओए भूतनी के’को प्रचार गर्नेछन् । मिमो पुस २ मा नेपाल आउने तय भएको जानकारी फिल्मका मिडिया संयोजक प्रदीप सिंहले दिए ।

काठमाडौंमा उनले फिल्मको प्रबर्द्धन र मिडिया भेटघाट गर्नेछन् । पर्वतीय उडान र पशुपतिनाथ मन्दिरको दर्शन गर्ने तयारीमा रहेका उनी ३ दिन काठमाडौंमा रहनेछन् ।

अजय कैलाश यादव निर्देशित यो फिल्म पुस १० गते क्रिसमसमा विश्वब्यापी प्रदर्शन तयारीमा छ । निर्माता र अन्य कलाकारको टोली पनि यतिबेला काठमाडौं छ । अर्का कलाकार रोहित सूर्यवंशी काठमाडौंमा आइसकेका छन् ।

‘मिल्यो भने मिथुन चक्रवर्तीलाई पनि नेपालमा ल्याउने हाम्रो तयारी छ । उहाँ आउनु भएन भने शुभकामनाको भिडियो सन्देश अवश्य आउँछ’ संयोजक सिंहले अनलाइनखबरसँग भने ।

‘ओए भूतनी के’मा एकजना नेपाली निर्माताको पनि लगानी छ । फिल्मका चारजना निर्मातामध्ये ललितपुरको पाटनका राजेश शाक्य पनि एक हुन् । ललितपुरमै बसोबास गरिरहेका प्रवीण राजवंशीका छोरा रोहित पनि यो फिल्मका कलाकार हुन् । ‘नागिनी’बाट चर्चित डायना खान पनि यसमा छिन् ।

– यस समाचारको श्रोत : Online Khabar हो ।