‘छक्कापञ्जा ५’ले बाढीपहिरो प्रभावित क्षेत्रको पुननिर्माणमा सघाउने
काठमाडौं । फिल्म ‘छक्कापञ्जा ५’ले बाढीपहिरो प्रभावित क्षेत्रको पुननिर्माण र राहत अभियानमा सघाउने भएको छ । छायांकन थलो काभ्रेको मंगलटार, गाम्छा र आसपासका क्षेत्रको पुननिर्माणमा फिल्मको टोली खटिने भएको हो ।
शुक्रबार आयोजित पत्रकार सम्मेलनमा निर्माता तथा अभिनेता दीपकराज गिरीले छायांकन भएको थलो आसपासमा बाढीले पुर्याएको क्षतिले आफूहरु मर्माहत भएको बताए । तिहार लगत्तै फिल्मको टोली ती क्षेत्रमा पुगेर स्थानीयसँगै पुननिर्माणमा खटिने भएको छ ।
कलाकारको टोली प्रभावित क्षेत्रमा पुगेर खट्ने भएको हो । ‘त्यहीँ बसेर हामी स्थानीयको दुःखमा हात थाम्नेछौं’ गिरीले भने, ‘फिल्ममा देखाइएका कतिपय ठाउँ बाढीले तहसनहस छन् । त्यो ठाउँमा हामी जान्छौं र आफूले निर्वाह गर्नुपर्ने दायित्व पुरा गर्नेछौं ।’
फिल्मबाट कमाएको निश्चित रकम पनि बाढीपहिरो पीडितलाई हस्तान्तरण गरिने भएको छ । ‘कलाकार फिल्म सुटिङका लागि मात्र होइन रहेछन् भन्ने अनुभूति गर्न चाहन्छौं’ गिरीले भने, ‘ठाउँ हेरेर ठूलो मन बनाएर सहयोग गर्नेछौं ।’
‘छक्कापञ्जा ५’ काभ्रे र पोखरा आसपासमा छायांकन भएको थियो । दीपाश्री निरौला निर्देशित फिल्मले यतिबेला बक्स अफिसमा आक्रामक कमाइ गरिरहेको छ ।
– यस समाचारको श्रोत : Online Khabar हो ।