स्थानीय तह उपनिर्वाचनमा कांग्रेसबाट कुन पालिकामा को को आकांक्षी ?

१४ कात्तिक, काठमाडौं । १६ मंसिरमा हुने स्थानीय तहको उपनिर्वाचनका लागि नेपाली कांग्रेसमा उम्मेदवारका आकांक्षीको चर्चा सुरु भएको छ ।

३० वैशाख २०७९ मा भएको चुनावबाट निर्वाचित भई हाल रिक्त रहेका मेयर, उपमेयर, गाउँपालिका अध्यक्ष, उपाध्यक्ष र वडाध्यक्ष पदका लागि उपनिर्वाचन हुन लागेको छ ।

जिल्ला समन्वय समिति प्रमुख २, गाउँपालिका अध्यक्ष २, नगरपालिका प्रमुख १, गाउँपालिका उपाध्यक्ष ४, नगरपालिका उपप्रमुख १, गाउँपालिका वडाध्यक्ष ९ र नगरपालिका वडाध्यक्ष २१ गरी जम्मा कूल ४० पदका लागि उपनिर्वाचन हुँदैछ ।

प्रमुखका लागि कीर्तिपुर नगरपालिका, उपप्रमुखका लागि नलगाड नगरपालिका, अध्यक्षमा ग्रामथान र महाबु गाउँपालिकामा चुनाव हुँदैछ ।

उपाध्यक्षका लागि गौरीशंकर, सर्केगाड, पुथाउत्तरगंगा र स्वामीकार्तिक खापरमा उपनिर्वाचन हुनेछ । प्रमुख, उपप्रमुख, अध्यक्ष र उपाध्यक्षका अतिरिक्त खाली भएका वडाध्यक्षको पदका लागि पनि चुनाव गर्न लागिएको छ ।

नेपाली कांग्रेसले स्थानीय तहको उपनिर्वाचनका लागि महामन्त्री विश्वप्रकाश शर्मालाई चुनावी कमाण्डर तोकेको छ । यो बाहेक केन्द्र स्तरमा कुनै तयारी नदेखिए पनि सम्बन्धित स्थानीय तहमा भने उम्मेदवारको चर्चा र सम्भावनाबारे छलफल सुरु भइसकेको छ ।

कीर्तिपुर नगरपालिकामा प्रमुखका लागि कांग्रेसबाट पाँच जना मुख्य आकांक्षी देखिएका छन् । कृष्णमान डंगोल, बद्रीलाल महर्जन, जमुना नकर्मी, सशीर महर्जन, हिमाल कार्की लगायतको नाम चर्चामा आएको छ ।

कांग्रेसका जिल्ला तहका नेताका अनुसार स्वभाविक र बलियो दाबेदार कांग्रेसको कीर्तिपुर नगरपालिका समितिका सभापति कृष्णमान डंगोल देखिएका छन् । तीनपटक कीर्तिपुर नगर सभापति भएका डंगोल ललितकला क्याम्पसका पूर्वस्ववियू अध्यक्ष हुन् ।

उम्मेदवार हुने इच्छा राखेका बद्रीलाल नगरका पूर्वसभापति र पुराना नेता हुन् । निधन भएका पूर्वप्रमुख राजकुमार नकर्मीकी पत्नी जमुनाले पनि उम्मेदवार हुने इच्छा राखेको कांग्रेसका नेताहरु बताउँछन् । पेशाले अधिवक्ता जमुना राजनीतिमा कम क्रियाशील छिन् ।

युवा पुस्ताबाट टिकटको आकांक्षी राख्नेमा सशीर महर्जन छन् । सशीर खेलकुद क्षेत्रमा समेत संलग्न छन् । मेयरको टिकटका आकांक्षी हिमाल कार्की पार्टी जिल्ला सदस्य हुन् ।

काठमाडौं क्षेत्र नं १० पर्ने नगरपालिका भएकाले यहाँको टिकट वितरणमा सांसद राजन केसीको प्रभाव पर्ने विश्लेषण जिल्ला तहका नेताहरु गर्छन् ।

केसीको रोजाइमा हिमाल कार्की एक जिल्ला नेताले दाबी गरे । नगर सभापति डंगोलले आफ्नो दाबी प्राकृतिक हुने बताए ।

अनलाइनखबरसँग डंगोलले भने, ‘तीन पटक नगरको सभापति बनें । मेरो दाबी प्राकृतिक हो । इच्छा राख्ने ९/१० जना साथीहरु हुनुहुन्छ ।’ नगर समितिले तिहारलगत्तै माथिल्लो तहलाई आकांक्षीहरुको नाम सिफारिस गर्ने उनले जानकारी गराए ।

मोरङस्थित ग्रामथान गाउँपालिकाको अध्यक्षका लागि मूख्य गरी पाँच जनाको नाम चर्चामा आएको छ ।

ग्रामथान पालिकाका कांग्रेस सभापति तुलसी विश्वास (किरण), पूर्व महासमिति सदस्य बलराम सरदार, तरुण दलको केन्द्रीय सदस्य शेखर विश्वास, पूर्व महासमिति सदस्य सूर्यनारायण माझी, २०६४ सालमा संविधान सभाको उम्मेदवार भइसकेका सत्यनारायण भगत लगायतले ले टिकटको अपेक्षा गरेका छन् ।

जाजरकोटको नलगाड नगरपालिकाको उपप्रमुख पदमा हुने उपनिर्वाचनमा मुख्यगरी चार जनाको नाम चर्चामा रहेको छ । रतनकला गिरी, जानकी विक, सुशीला शाही र शारदा सिंह छन् । रतनकला नेविसंघ हुँदै हाल महिला संघको राजनीतिमा क्रियाशील छन् । विक यही नगरपालिकाको पूर्वकार्यपालिका सदस्य हुन् ।

सुशीला शाही किसान महासंघको कर्णाली प्रदेशको सचिव हुन् । शारदा सिंह शहीद परिवारकी सदस्य हुन् । दुई वर्ष अवधि हुने भएकाले विवाद नगरी नाम सिफारिस गर्न नगर समितिलाई सुझाव दिएको जाजरकोटका पार्टी सभापति बेदराज सिंहले बताए ।

‘सकभर सर्वसम्मत गरेर नाम पठाउन भनेका छौं । धेरै समय कार्यकाल हुने पनि होइन । विवाद नगर्न भनेको छौं’, सिंहले अनलाइनखबरसँग भने ।

दोलखाको गौरीशंकर गाउँपालिका उपाध्यक्षको उम्मेदवारमा एक जनाको मात्रै सिफारिस परेको छ । दोलखाका कांग्रेस सभापति बर्मा लामाले उपाध्यक्षको उम्मेदवारमा पासाङ डीपी शेर्पा तामाङको नाम सर्वसम्मत भएको जानकारी गराए । उनी निधन भएका उक्त पालिकाका उपाध्यक्ष श्यामसुन्दर तामाङकी पत्नी हुन् । पासाङ १२ औं महाधिवेशनदेखि कांग्रेसमा क्रियाशील छन् ।

बाजुरास्थित स्वामीकार्तिक खापर गाउँपालिकाको उपाध्यक्षमा पुल्तीसरा शाही र अप्सरा शाही टिकटका आकांक्षी छन् । पुल्तीसरा पालिका तहको पार्टी संरचनामा काम गरिरहेकी छन् भने अप्सरा निर्वाचित जिल्ला समिति सदस्य हुन् । उनीहरुमध्ये एक जना उम्मेदवार हुने सम्भावना रहेको बाजुराका पूर्व जिल्ला सभापति मानबहादुर रावलले जानकारी गराए ।

हुम्लास्थित सर्केगाड गाउँपालिका उपाध्यक्षका लागि सुशीला शाही, रतनकला रोकाया, सविता बुढा लगायतले टिकटको अपेक्षा राखेका छन् । शाही हाल हुम्लाको महिला संघको सभापति हुन् ।

महाबु गाउँपालिका दैलेखको अध्यक्षका लागि उम्मदेवार हुन चाहना राख्नेमा पूर्व जिल्ला सदस्य झलक भण्डारी, उक्त पालिकाको सभापति कर्णबहादुर शाही, प्रेस युनियनको प्रदेश सदस्य सुवर्ण शाही, जिल्ला सहसचिव कनक सेन ठकुरी, तरुण दलमा आवद्ध मिलन विक लगायतको नाम चर्चामा रहेको छ ।

रुकुम पूर्वस्थित पुथाउत्तरगंगा गाउँपालिकाको उपाध्यक्षमा कांग्रेसबाट कमला कुमारी मल्लको सम्भावना बढी रहेको केन्द्रीय सदस्य मानबहादुर नेपालीले जानकारी गराए ।

रोका अघिल्लो चुनावमा पराजित भएकी थिइन् । ‘शिक्षण पेशाबाट राजीनामा गराएर राजनीतिमा उहाँलाई ल्याइएको हो । उहाँको नाममा पार्टीका साथीहरु छलफल गर्दैहुनुहुन्छ,’ नेपालीले भने ।

वडा सदस्य र अध्यक्षको उम्मेदवार छान्ने अधिकार प्रतिनिधि सभा क्षेत्र संसदीय समितिलाई छ । गाउँपालिका अध्यक्ष र उपाध्यक्षको उम्मदेवार चयन गर्ने निकाय जिल्ला संसदीय समिति हो । नगरपालिका अध्यक्ष र उपाध्यक्ष उम्मेदवारको टिकट वितरण प्रदेश कार्यसमितिले गर्दछ ।

– यस समाचारको श्रोत : Online Khabar हो ।