सातदोबाटोको पोष्टमा ६ गोल हान्दै पुलिस शीर्ष स्थानमा
१५ साउन, काठमाडौं । नेपाल पुलिस क्लबले ललित स्मृति एन्फा यू-१८ युथ लिग फुटबलमा मंगलबार सातदोबाटो युथ क्लबलाई ६-१ को फराकिलो अन्तरले पराजित गरेको छ । यो जितपछि पुलिस शीर्ष स्थानमै फर्किएको छ ।
सातदोबाटोस्थित एन्फा कम्प्लेक्स मैदानमा भएको खेलमा पुलिसका लागि कप्तान सुवास बम र विक्रम गौतमले दुई-दुई गोल गरे । यस्तै साजनराज गौतम र गणेश पुलामी मगरले समान एक गोल गरे ।
जितपछि पुलिस ५ खेलमा १३ अंक जोडेर शीर्ष स्थानमा उक्लिएको छ । पराजित सातदोबाटोको समान खेलबाट चार अंक छ ।
सातदोबाटोस्थित एन्फा मुख्यालय मैदानमा पुलिसलाई जित दिलाउन विक्रम गौतम र सुवास बमले समान दुई तथा साजनराज गौतम र गणेश पुलामीमगरले समान एक गोल गरे । सातदोबाटोका लागि निशप्रकाश बरालले एक गोल फर्काए ।
साजनले २९औ मिनेटमा गोल गर्दै पुलिसलाई अग्रता दिलाएका थिए । विक्रमले ३७औं मिनेटमा पुलिसको अग्रता दोब्बर बनाए ।
दोस्रो हाफमा पुलिसले चार गोल थप्यो । सुवासले ६१औं र ७९औं मिनेटमा गोल गरे भने विक्रमले ६९औं मिनेटमा व्यक्तिगत दोस्रो गोल गरे । ९०औं मिनेटमा गणेशले गोल गर्दै पुलिसलाई ६-० को अग्रता दिलाए ।
सातदोबाटोका लागि निशप्रकाशले इन्जुरी टाइममा सान्त्वना गोल फर्काए ।
मंगलबारै भएको पहिलो खेलमा जावलाखेल युथ क्लबले चर्च ब्वाइज युनाइटेडलाई ४-२ ले हराउँदै लिगमा पहिलो जित हासिल गरेको थियो ।
– यस समाचारको श्रोत : Online Khabar हो ।