‘आँखा’ असोज ११ मा रिलिज हुने, ‘मेगालोपोलिस’ पनि आउला ?

काठमाडौं । सामाजिक विषयवस्तुमा आधारित फिल्म ‘आँखा’को प्रदर्शन मिति तय भएको छ । निर्माता कम्पनी लामा सिनेमाजले असोज ११ गतेलाई रिलिज मिति घोषणा गरेको हो ।

यो मितिमा अहिलेसम्म कुनैपनि नेपाली फिल्मले रिलिज डेट घोषणा नगरेपनि भारतीय फिल्म ‘देवरा : पार्ट वान’ आउने अनुमान छ । यो मितिमा हलिउडको प्रतीक्षित ‘मेगालोपोलिस’ पनि आउने चर्चा छ ।

यस वर्षको कान्स फिल्म फेस्टिभलमा वर्ल्ड प्रिमियर भएको ‘मेगालोपोलिस’ हेर्न काठमाडौं महानगरका प्रमुख बालेन शाह पनि कान्समा पुगेका थिए । यो फिल्मको नेपाल रिलिज डेटबारे अपडेट आउन बाँकी छ ।

‘आँखा’को कुरा गर्दा निर्माताले प्रदर्शन मितिबारे जानकारी दिन पोस्टर पनि बाहिर ल्याएका छन् । पोस्टमा कलाकार आरके मेहता र स्मिता लामिछाने फिचर्ड छन् । जौन योञ्जन निर्देशक हुन् ।

ढाका टोपी फिल्म्स, कार्यक्रम नेपाल, साइलेन्ट एक्ट र ट्राइडेन्ट कन्सेप्टको सहकार्यमा तयार भएको ‘आँखा’लाई आरआर फिल्म्सले वितरण गर्नेछ । यो फिल्ममा निशा अधिकारी, बुद्धि तामाङ, विजय बराल, सरोज खनाल, पशुपति राई, कृष्णभक्त महर्जन, राजन खतिवडा, प्रवीण खतिवडा, लुनिभा तुलाधर, रवीन्द्र झा र अभयराज बरालको पनि अभिनय छ ।

निर्देशक योञ्जनले ‘आँखा’ले व्यक्तिदेखि समाजको वास्तविकतालाई कथा मार्फत प्रस्तुत गर्ने बताए ।

– यस समाचारको श्रोत : Online Khabar हो ।