टेबल टेनिसमा नेपाललाई ओलम्पिक पुग्ने अवसर
२४ वैशाख, काठमाडौं । नेपाली टेबल टेनिसको इतिहासमै पहिलो पटक नेपालमा ओलम्पिकको अन्तिम चरणको छनोट हुँदैछ । जसबाट नेपाली खेलाडी घरेलु मैदानमै खेलेर ओलम्पिकमा छनोट हुने मौका छ ।
आगामी जुलाई-अगस्टमा फ्रान्समा हुने पेरिस ओलम्पिक २०२४ को लागि टेबलटेनिसको दक्षिण एसियाली छनोट प्रतियोगिता मे १३ देखि १५ (वैशाख ३१ देखि जेठ २) सम्म नेपालमा हुँदैछ । ३ दिने प्रतियोगिता लैनचोरस्थित नेशनल टेबल टेनिस ट्रेनिङ सेन्टरमा हुनेछ ।
नेपालमा टेबल टेनिसको इतिहासमै पहिलो पटक ओलम्पिकको छनोट प्रतियोगिता हुन लागेको हो । पेरिस ओलम्पिकका लागि एसियाको ५ विभिन्न क्षेत्रको छुट्टा छुट्टै छनोट प्रतियोगिता आयोजना हुन लागेको हो । जसले गर्दा नेपाल जस्तो देशको लागि छनोट चरण पार गरेरै ओलम्पिक खेल्ने अवसर हुनेछ ।
‘नेपाली टेबलटेनिस इतिहासमा यो ओलम्पिकमा छनोट हुने यो सबैभन्दा उपयुक्त अवसर हो । त्यसमा पनि घरेलु कोर्टमा खेल्न पाउनेछौँ । नेपाली खेलाडीका लागि राम्रो अवसर आएको छ’, टेबलटेनिसका मुख्य प्रशिक्षक राजेन्द्र कपालीले आइतबार आयोजित पत्रकार सम्मेलनमा भने ।
पहिलोपटक ओलम्पिक छनोट प्रतियोगिता हुन लागेको र त्यसमा पनि घरेलु मैदान हुँदा अझै फाइदा हुने बताउँछन्, एसियाली टेबलटेनिस युनियनमा समेत रहेका शंकर गौतम । ‘यसअघि छनोट चरणका खेल भएपनि अन्तिम चरणको छनोट प्रतियोगिता भएको छैन । विशेषगरी नेपाललाई घरेलु मैदानमा हुँदा फाइदा छ । यहाँबाट नेपाली खेलाडीलाई सित्रै पेरिस ओलम्पिकमा छनोट हुने मौका समेत छ’, उनले भने ।
नेपाललाई घरेलु कोर्टको फाइदा छ नै अर्को फाइनल पनि छ भारत सहभागी नहुनु । दक्षिण एसियाकै बलियो राष्ट्र भारतका खेलाडी वरियताका आधारमा सिधै पेरिस ओलम्पिकमा छनोट भइसकेकोले यस पटक छनोटमा भारत हुने छैन । भुटान पनि सहभागी छैन ।
‘भारत नहुनु पनि हाम्रो लागि ठूलो फाइदा हुनेछ । त्यसैले हाम्रो लागि छनोट जितेरै ओलम्पिक पुग्ने अवसर छ’, मुख्य प्रशिक्षक राजेन्द्र कपालीले भने, ‘अहिलेसम्म तेक्वान्दोका दुई खेलाडी मात्र छनोट चरण पार गरेर ओलम्पिक खेलेका छन् । टेबलटेनिसबाट कोही छनोट भएमा तेस्रो खेलाडी बन्नेछन् ।’
कपालीले भारत नभएपछि नेपालको श्रीलंका नेपालको मुख्य प्रतिस्पर्धीको रुपमा रहने बताए । नेपालसहित बंगलादेश, माल्दिभ्स, पाकिस्तान र श्रीलंका गरी ५ राष्ट्रका खेलाडी सहभागि हुने लोकल टुर्नामेन्ट डिरेक्टर तेजेन्द्र सिंह महराले जानकारी दिए ।
भारतका खेलाडी यसअघि नै वरीयतामा माथि रहेर सिंगल्समा छनोट भइसकेको छ । ३ दिने प्रतियोगितामा नेपालबाट राष्ट्रिय च्याम्पियनहरु नविता श्रेष्ठ र श्यान्टु श्रेष्ठसहित संयोग कपाली र इभाना मानन्धरले प्रतिस्पर्धा गर्नेछन् । नविता र इभानाले महिला सिंगल्स तथा श्यान्टु र संयोगले पुरुष सिंग्लसमा प्रतिस्पर्धा गर्नेछन् ।
हाल अष्ट्रेलियामा बस्दै उतै टेबलटेनिस खेलिरहेका श्यान्टु श्रेष्ठ यस छनोट प्रतियोगितालाई लिएर एकदमै उत्साहित छन् । ‘म यो प्रतियोगितालाई लिएर एकदमै उत्साहित छु । हाम्रो लागि ओलम्पिकमा छनोट हुने यो राम्रो अवसर छ’, अष्ट्रेलियाबाट श्यान्टुले अनलाइनखबरसँग भने, ‘दक्षिण एसियाको पावरहाउस भारत नहुँदा ओलम्पिकमा छनोट हुने धेरै सम्भावना छ ।’
श्यान्टु यस प्रतियोगिताका लागि उतै तयारी गरिरहेका छन् । उनी मे ९ मा नेपाल आउने उनले बताए ।
यस्तै बाँकी खेलाडी नेपालमै प्रशिक्षण गरिरहेका छन् । उनीहरुलाई राजेन्द्र कपालीले प्रशिक्षण दिइरहेका छन् ।
छनोट प्रतियोगितामा दक्षिण एसियाका ५ राष्ट्रका २ पुरुष र २ महिलागरी कूल २० खेलाडी सहभागी हुनेछन् । महिलामा १० र पुरुषमा १० खेलाडीले प्रतिस्पर्धा गर्नेछन् । यसबाट १ पुरुष र १ महिला खेलाडीले पेरिस ओलम्पिकको टिकट काट्नेछन् ।
पेरिस ओलम्पिक आगामी जुलाई २६ देखि अगष्ट ११ सम्म पेरिसमा हुँदैछ । जसमा टेबलटेनिसको प्रतिस्पर्धा जुलाई २७ देखि अगष्ट १० सम्म पेरिस एक्सपो पोर्ट डे भर्साइलेसमा हुनेछ ।
ओलम्पिकमा टेबलटेनिसमा ५ विधा समावेश गरिएको छ । त्यसमध्ये दक्षिण एसियाली क्षेत्रको छनोटमा पुरुष र महिला सिंगल्स विधामा मात्र प्रतिस्पर्धा गराइनेछ । दुवै विधाबाट १-१ महिला र पुरुष खेलाडीले पेरिस ओलम्पिकमा स्थान पक्का गर्नेछन् ।
एसियामा ५ फरक क्षेत्रको छुट्टा छुट्टै क्षेत्रिय छनोट प्रतियोगिता हुनेछ जसबाट महिला र पुरुषको दुवै विधाको विजेता ओलम्पिक पुगेनछन् ।
नेपालमा हुने दक्षिण एसियाली क्षेत्रको छनोट प्रतियोगिताको ड्र एक दिन अघि मे १२ मा हुने एसियन टेबल टेनिस युनियन (एटीटीयु) ले जनाएको छ । एटीटीयुका अनुसार पहिलो चरणको खेल सकिएपछि दोस्रो चरणको ड्र गरिनेछ ।
खेल लिगकम नकआउटका आधारमा हुने लोकल टुर्नामेन्ट डिरेक्टर तेजेन्द्र सिंह महराले जानकारी दिए । नेपालमा ओलम्पिकको छनोट प्रतियोगिता हुन लाग्दा अहिले अखिल नेपाल टेबलटेनिस संघको निर्वाचन समयमा नभएकोले तदर्थ समिति मात्र छ । तदर्थ समितिको पनि थप गरिएको समय सकिएकोले नयाँ तदर्थ समिति बनाउने तयारी हुँदैछ ।
तदर्थ समितिका संयोजक चतुरानन्द राजवैद्यले पनि नेपाली टेबलटेनिस इतिहासमा ओलम्पिक पुग्ने यो ठूलो अवसर भएको बताए । छनोट प्रतियोगितालाई राष्ट्रिय खेलकुद परिषद र नेपाल ओलम्पिक कमिटीको पनि सहयोग रहने प्रशिक्षक कपालीले जानकारी दिए ।
– यस समाचारको श्रोत : Online Khabar हो ।