टेबल टेनिस संघको चुनाव गराउने तयारीमा राखेप
२५ असार, काठमाडौं । लामो समयदेखि विवादका कारण हुुन नसकेको टेबल टेनिस संघको चुनाव गराउन राष्ट्रिय खेलकुद परिषदले गठन गरेको समिति हाल चुनावी कार्यविधि बनाउन जुटिरहेको छ ।
राखेप खेलकुद विकास विभाग प्रमुख सरोजकुमार पोखरेल, संघसंस्था शाखा प्रमुख चन्द्रकुमार राई र कानुन शाखा प्रमुख नारायणराज अर्याल रहेको समिति हाल चुनावको कार्यविधि बनाउन जुटिरहेको सदस्य राईले बताए ।
‘हामीले ३/४ तहको काम सकेर हाल चुनावी कार्यविधि बनाउने काममा जुटिरहेका छौं’, उनले भने ।
संघको नवीकरण र वैधानिक कार्यसमिति गठन गर्न २०८० साउन ३१ गते निवर्तमान अध्यक्ष चतुरानन्द वैद्यको संयोजकत्वमा तदर्थ समिति गठन भएको थियो ।
जसको ३ पटकसम्म क्रमशः ३ महिना, २ महिना र ३ महिना म्याद थप गर्दा पनि चुनाव गराउन सकेन ।
बारम्बार तदर्थ समिति बनाउँदा र म्याद थप गर्दा पनि टेबल टेनिस संघको चुनावको मिति घोषणा हुन नसक्दा हाल राखेपले नै चुनावी समिति गठन गरेको हो ।
तदर्थ समितिको ३ पटकसम्म म्याद थप्दासमेत चुनाव गराउन नसकेपछि हाल टेबल टेनिस संघ कार्यसमितिविहीन छ ।
– यस समाचारको श्रोत : Online Khabar हो ।