Main

डर्टमण्डका प्रशिक्षक एडिन टेर्जिकले छाडे क्लब

३१ जेठ, काठमाडौं । जर्मन क्लब बोरुसिया डर्टमण्डका प्रशिक्षक एडिन टेर्जिकले क्लब छोडेका छन् ।

टेर्जिकले डर्टमण्डसँग तत्कालै लागू हुनेगरी आफ्नो सम्झौता रद्द गर्न भनेपछि क्लबले पनि त्यसमा सहमति जनएको हो ।

जर्मन क्लब डर्टमण्डले छलफलपछि टेर्जिकको प्रस्तावमा सहमत भएको जनाएको छ ।

टेर्जिकको प्रशिक्षणमा डर्टमण्ड युरोपियन च्याम्पियन्स लिग २०२३-२४ को फाइनलमा पुगेको थियो । तर वेम्बलीमा भएको फाइनलमा डर्टमण्ड रियल मड्रिडसँग पराजित भएको थियो ।

४१ वर्षीय टेर्जिकले वेम्बलीमा भएको खेलपछि क्लबको सिनियर अफिसियलसँग आफूले छलफल गरेको र डर्टमण्डमा सबैखाले भूमिकामा गरी ९ वर्ष बिताएपछि क्लबमा नयाँ युगको सुरुवात हुनुपर्ने महसुस भएको बताए ।

उनले डर्टमण्डको सफलताको शुभकामना व्यक्त गर्दै फेरि भेट्ने बताएका छन् ।

टेर्जिकले सन् २०१० मा डर्टमण्डको एकेडेमीबाट कोचिङ करियर सुरु गरेका थिए । २०१३ पछि उनी टर्किस क्लब बेसिकटासमा स्लाभेन बिलिचको सहायकको रुपमा काम गरेका थिए ।

उनी २०१८ मा लुसिएन फाभ्रेको सहायकको रुपमा डर्टमण्ड फर्केका थिए । २०२० डिसेम्बरमा फाभ्रेको बर्खास्तीपछि टेर्जिक त्यस सिजनको अन्त्यसम्म अन्तरिम प्रशिक्षक बने । त्यसपछि उनी क्लबको क्निकल डिरेक्टर बने । २०२२ देखि टेर्जिक डर्टमण्डको प्रशिक्षक पदमा थिए ।

– यस समाचारको श्रोत : Online Khabar हो ।

Related Articles

Back to top button