Main

डायस्पोरामा पनि उछाल ‘पूर्णबहादुरको सारंगी’, अमेरिकामा शो संख्या ३५० नाघ्यो

काठमाडौं । ‘पूर्णबहादुरको सारंगी’ यतिबेला नेपालमा ‘सर्वकालिन ब्लकबस्टर’ बन्ने संघारमा छ । फिल्मले अहिलेसम्मका सबै रेकर्ड भत्काउँदै धेरै कमाउने फिल्मको रेकर्ड राख्ने निश्चित भएको छ ।

फिल्मले स्वदेशमा मात्र होइन, डायस्पोरा बजारमा समेत दर्शकको उल्लेखनीय साथ पाएको छ । विशेषगरि, अमेरिका र अष्ट्रेलियामा फिल्मले उछाल कमाइ गरेको छ । दर्शकको बढ्दो मागअनुसार शो संख्यामा पनि वृद्धि गरिएको निर्माताले जनाएका छन् ।

अमेरिकामा यो फिल्मलाई निर्माता समेत रहेका प्याट्रिक सुवेदीको नेपाल एलेभेन इन्टरटेनमेन्टले प्रदर्शनमा ल्याएको हो । नोभेम्बर ३ मा अमेरिकामा रिलिज भएको फिल्मको मंगलबारसम्म कूल शो संख्या ३५० नाघेको जानकारी वितरक सुवेदीले जानकारी दिए ।

यो फिल्म टेक्सास राज्यको डालस, अस्टिन, ह्युस्टन, वाको, ओहायोको कोलम्बससहित ४ स्थान, केन्टुकीको लेक्जिङ्टन र लुइसभिले, पेन्सिलभेनिया, म्यासाचुसेट्स, नर्थ ह्याम्सहायर, कनेक्टिकट, नेब्रास्का, आयोवा, इलिनोइस, क्यालिफोर्नियाका बे एरिया र लस एन्जलससहित ४ ठाउँ, ओरेगन, वासिङ्टनमा फिल्म रिलिज भएको छ ।

दुई दिनमै फिल्मले २२४ शोज प्राप्त गरेको थियो जुन कीर्तिमानी रहेको वितरकले जनाएका छन् । नोेभम्बर १७ देखि नेपाली समुदायको बाक्लो बसोबास रहेको मेरिल्याण्डमा फिल्म रिलिज तय भएको छ । नोभेम्बर १७ र २० मा त्यहाँ ४ शो निर्धारण गरिएका छन् ।

क्यालिफोर्नियाको बे एरियामा नोेभेम्बर १० मा ११ शो तय गरिए । फ्रिमोन्ट सिने लाउन्जमा ७ र सिनेमार्क हिलटपमा ४ शो देखाइएको थियो । सोही मितिमा टेक्सासको डालसमा मात्र १५ शो देखाइएको छ । नोभेम्बर १५ मा डेनभर कोलोराडो र एरिजोना राज्यको चान्डलर र फिनिक्ससहित एट्लान्टा, नासभिल, ह्यारिसबर्ग, बफेलो न्यूयोर्क, टेक्सासको शेर्मन र फेर्ट वर्थमा समेत लाग्दैछ ।

लगातारको शोल्ड आउटको कारण कोलम्बस ओहायोस्थित क्रसरोड सिनेमामा ठूला सिनेमा थप गरिएको नेपाल एलेभन इन्टरटेनमेन्टले जनाएको छ । मंगलबार मात्रै कोलम्बसमा ३३ शो तय छन् ।

अष्ट्रेलियामा पनि उछाल, विदेशीलाई उछिन्यो

वितरण कम्पनी सेभेन सिजका अनुुसार ‘पूर्णबहादुरको सारंगी’ले अष्ट्रेलियामा पनि उछाल कमाइ गरिरहेको छ । निर्माता तथा वितरक विनोद पौडेलका अनुसार फिल्म अष्ट्रेलियन क्यापिटल टेरिटोरी, न्यु साउथ वेल्स, क्विन्सल्याण्ड, साउथ अष्ट्रेलिया, तास्मानिया, भिक्टोरिया, वेस्टर्न अष्ट्रेलियाका २६ हलमा रिलिज भएको छ ।

प्राप्त विवरणअनुसार अष्ट्रेलियाली हलमा पूर्णबहादुरको सारंगीले अन्य विदेशी फिल्मले भन्दा उच्च शो प्राप्त गरेको छ । नोभेम्बर ११ मा डाउनी जुनियर स्टारर हलिउड फिल्म ‘रेड वन’भन्दा धेरै शो नेपाली फिल्मले पाएको छ । तामिल फिल्म ‘अमरन’ले १ शो पाउँदा नेपाली फिल्मको शो संख्या ५ छ ।

फिल्म हेरेपछि त्यहाँस्थित नेपाली दर्शकले सामाजिक संजालमा उत्साहजनक प्रतिक्रिया दिएका छन् । वितरक पौडेलले अष्ट्रेलियासहित न्यूजिल्याण्डमा पनि फिल्मले उत्साहजनक कमाइ गरिरहेको बताए ।

विहिबारदेखि कतारमा, जापानमा शो थपिए

‘पूर्णबहादुरको सारंगी’ विहिबारदेखि कतारमा प्रदर्शन तयारीमा छ । गत नोभेम्बर ७ देखि युएई र बहराइनमा भने प्रदर्शन भैरहेको छ । युएईका १५ हलमा फिल्म प्रदर्शनरत छ ।

मध्यपूर्वमा क्रमशः फिल्म रिलिज भैरहेको वितरक तथा कार्यकारी निर्माता रमेश ढकालले जानकारी दिए । नेपालको प्रतिक्रियाले मध्यपूर्वमा फाइदा पुगेको जानकारी उनले दिए । फिल्मलाई चाँडै युरोपब्यापी प्रदर्शनको तयारी भैरहेको जनाइएको छ ।

– यस समाचारको श्रोत : Online Khabar हो ।

Related Articles

Back to top button