डीएभी विद्यालयमा बुद्धको जीवन र दर्शनमा आधारित गीति नाटक मञ्चन

काठमाडौं । डीएभी सुशील केडिया विश्व भारती विद्यालयमा भगवान गौतम बुद्धको जीवन र दर्शनमा आधारित रहेको गीति नाटक प्रदर्शन गरिएको छ ।

करिब ३ घण्टा लगातार प्रदर्शन भएको गीतिनाटकमा विद्यार्थीहरूले गौतमबुद्ध जन्मिनुपूर्वको परिदृश्य, राजश्री बाल्यकाल, शिक्षा–दिक्षा, गृहस्थ जीवन, गृहत्याग, जीवनको चिन्तन र दुःख मुक्ति मार्गको खोजी र बुद्धत्व प्राप्तिका साथै विभिन्न समयमा सामना गरेका कठिन परिस्थितिलाई निकै मार्मिक ढंगले प्रस्तुत गरेका थिए ।

विद्यालयका अनुसार नाटकमा कक्षा १–१२ सम्मका १५० बढी विद्यार्थीहरूले अभिनय गरेका थिए ।

गीति नाटक डीएभी विद्यालयले आयोजना गर्ने ‘एक आध्यात्मिक सन्ध्याको’ अंश रहेको विद्यालयले जनाएको छ ।

बुद्ध जीवनको गीति नाटकको स्क्रिप्ट लेखन, स्टेजको सजावट, अभिनय र प्रस्तुति, गीत संगीतको संयोजन लगायत सम्पूर्ण विषयवस्तुको मुख्य निर्देशकको भूमिकामा विद्यालयकी प्राचार्य डा. भुवनेश्वरी राव रहेकी थिइन् ।

करिब एक हप्ताको तयारीमै यस स्तरको नाटक मञ्चन हुनुमा विद्यार्थी भाइबहिनीहरूको मिहिनेत र लगाव सँगसँगै सम्पूर्ण शिक्षक र कर्मचारीहरूको भूमिका रहेको विद्यालयले जनाएको छ ।

बुद्ध जयन्तिको अवसरमा विद्यालयले कक्षा नर्सरी देखि १२ सम्मका सम्पूर्ण विद्यार्थीहरुलाई ‘बुद्ध र शान्ति’ विषयक चित्रकला प्रतिस्पर्धामा सहभागी गराएको थियो ।

नाट्यकलाकार विद्यार्थीलाई हौसला र प्रोत्साहन गर्न सिद्धिमंगल बिहार ललितपुरका प्रमुख भिक्षु विमलो, डीएभी विद्यालयका अध्यक्ष अनिल केडिया, त्रिभुवन विश्वविद्यालय बौद्धशिक्षा केन्द्रीय विभागकी प्रमुख डा. चन्द्रकला घिमिरे, त्रिविका सहप्राध्यापक त्रिरत्न मानन्धर, योगविशेषज्ञ डा. राजेन्द्र न्यौपाने लगायतको उपस्थित रहेको थियो ।

– यस समाचारको श्रोत : Online Khabar हो ।