तेस्रो निटफेस्टका लागि मण्डलाले माग्यो आवेदन

काठमाडौं । नेपाल अन्तर्राष्ट्रिय नाट्य महोत्सव (निटफेस्ट) २०२४ को आवेदन खुला भएको छ । आयोजक मण्डला थिएटरले विज्ञप्ति जारी गर्दै नाटकको आवेदन मागेको हो ।

इच्छुकले महोत्सवको आधिकारिक वेबसाइटमार्फत आवेदन दिन सक्ने संयोजक केदार श्रेष्ठले जनाए । नाटकबाहेक कार्यक्रमको लागि पनि निटफेस्टले आवेदन मागेको जनाएको छ । मे ३१ सम्म आवेदन दिन सकिने विज्ञप्तिमा उल्लेख छ ।

देश तथा विदेशबाट विभिन्न विधा तथा शैलीका नाटक मागिएको हो । जसमा व्यावसायिक रंगकर्मीले विभिन्न उमेर समूहका बालबालिकालाई लक्षित गरी सिर्जना गरेका नाटक समावेश हुने उल्लेख छ ।

महोत्सवमा कार्यशाला, सेमिनार, प्यानल छलफल, सांगीतिक नृत्य, सांस्कृतिक प्रस्तुति, विविध कला, साहित्य तथा र रंगमञ्चसम्बन्धी प्रदर्शनी पनि हुने जनाइएको छ । यसका लागि जुन ३० सम्म आवेदन दिन सकिने मण्डलाले जनाएको छ ।

‘सामाजिक रुपान्तरणका लागि रंगमञ्च : रैथाने ज्ञानको उज्यालो’ भन्ने मूल भावका साथ तेस्रो निटफेस्ट आगामी चैत ३ देखि १४ गतेसम्म आयोजना हुँदैछ । काठमाडौं र विभिन्न सहरमा दुईदेखि तीन दिनको समानान्तर महोत्सव पनि आयोजना हुने उल्लेख छ ।

– यस समाचारको श्रोत : Online Khabar हो ।