‘तेल भिसा’बारे ऋचा घिमिरे : १० वर्षपछि फिल्ममा फर्किँदा ऊर्जा महसुस भयो

काठमाडौं । शंकर घिमिरे निर्देशित फिल्म ‘तेल भिसा’को तेस्रो गीत सार्वजनिक भएको छ । ‘कति रमाइलो’ बोलको गीतको भिडियो ‘बेबी सावर’को सन्दर्भमा भएको नाचगान र जम्काभेटमा आधारित छ ।

यसअघि निर्माताले ‘हरि नाम झैँ’ र ‘तुकुनको मुकुन’ गीत सार्वजनिक गरेका थिए । सार्वजनिक नयाँ गीतलाई अमेरिकामा छायांकन गरिएको हो । अञ्जु पन्त र आशिष अविरलको स्वर समावेश गीतमा एकनारायण भण्डारीको शब्द र गायक अविरलको संगीत छ ।

शिशिर खातीको नृत्य निर्देशनमा रहेको भएको भिडियोमा कलाकार दिलिप रायमाझी, सुशील क्षेत्री, अरुणिमा लम्साल, उषा पौडेल, विमलेश अधिकारी, अनुराग कुँवर प्रस्तुत छन् । उनीहरुसँगै फिल्मका कलाकार विपिन कार्की, पूजा चन्द र ऋचा घिमिरे पनि फिचर्ड छन् ।

गीत सार्वजनिक गर्न आयोजित ऋचाले १० वर्षपछि नेपाली फिल्ममा काम गर्दा एकदमै ऊर्जा महसुस भएको अनुभव सुनाइन् । भन्छिन्, ‘सिनेमा नखेल्दा वा नबनाउँदा अक्सिजनको कमी हुने वा बाँच्नका लागि दिन कम हुने त होइन । तर, आफूलाई मन परेको काम गर्दा एकदमै ऊर्जा आउने रहेछ ।’

समारोहमा अभिनेत्री राउत पनि सहभागि थिइन् । अमेरिकामा मंचन तयारीमा रहेको नाटकलाई होल्ड गर्दै उनी फिल्म प्रवर्धन र चाड मनाउन स्वदेश आएकी हुन् । नाटक मंचनका लागि उनी तिहार लगत्तै अमेरिका जाने तयारीमा छिन् ।

मंसिर ७ गतेबाट प्रदर्शनको तयारीमा फिल्ममा बुद्धि तामाङ, सुचित्रा उप्रेती, अमेरिकी कलाकार फ्रान्सिस शेरमन, ज्याक बेल लगायतको पनि अभिनय छ । फिल्ममा विपिनले बुबा र छोराको गरी दोहोरो भूमिका निर्वाह गरेका छन् ।

वेलडन क्रियसनको ब्यानरमा निर्माण भएको फिल्मकी प्रस्तुतकर्ता ऋचा घिमिरे हुन् । निर्मातामा अनिल पाण्डे र शिवराज कार्की छन् । प्रिन्स युवराज कार्की र श्रुती दाहाल कार्यकारी निर्माता हुन् । सुशन प्रजापतिको छायांकन छ ।

– यस समाचारको श्रोत : Online Khabar हो ।