थाई एयर एसियाको नेपाल उडान तत्कालका लागि रोकियो

११ कात्तिक, काठमाडौं । अनुमति नलिई नेपाल आएको थाई एयर एसियालाई तत्कालका लागि नेपालमा उडान गर्न रोक लगाइएको छ ।

मुलुकको उड्डयन क्षेत्रको नियामक निकाय नेपाल नागरिक उड्डयन प्राधिकरणले विनाअनुमति यात्रु बोकेर थाइल्यान्डको बैंककबाट काठमाडौं आएको थाई एयर एसियालाई तत्काल कुनै पनि उडान गर्न नदिने निर्णय गरेको हो ।

‘अर्को निर्णय नभएसम्म थाई एयर एसियाको नेपालका सबै उडान निलम्बन गरिएको छ,’ प्राधिकरणका उपमहानिर्देशक तथा प्रवक्ता हंसराज पाण्डेले अनलाइनखबरसँग भने, ‘त्यसबाहेक अर्को निर्णय नभएसम्म उसलाई टिकट नकाट्न पनि पत्राचार गरिएको छ । उसको काठमाडौंस्थित जनरल सेल्स एजेन्ट (जीएसए) युनिभर्सल टुर्स एन्ड ट्राभल्सलाई पनि टिकट नकाट्न पत्र पठाएका छौं ।’

यसअघिका निर्धारित उडानहरू समेत रद्द गरिएको पाण्डेले बताए । आजबाट ‘विन्टर सेड्युल’ सुरु भएको थियो । सोही अनुसार कम्पनीले अनुमति नलिई जहाज काठमाडौं ल्याएपछि कारबाही स्वरूप उसका सबै उडान रोकिएको उनले बताए । ‘सोमबार यही विषयमा थप छलफल गर्छौं,’ उपमहानिर्देशक पाण्डेले भने ।

थाइल्यान्डको बैंककबाट थाई एयर एसियाको उक्त जहाज आइतबार दिउँसो काठमाडौं आएको थियो । उसले दिउँसो २ बजे त्रिभुवन अन्तर्राष्ट्रिय विमानस्थल अवतरण गर्ने बताएको थियो । तर, जहाजको उडान अनुमति शनिबार नै सकिएको थियो ।

अनुमति नलिई आएको जहाजलाई प्राधिकरणले आधा घण्टाभन्दा बढी आकाशमै ‘होल्ड’ गराएको थियो ।

तर, मानवीयताका आधारमा अवतरण अनुमति दिइएपछि जहाज त्रिभुवन विमानस्थल अवतरण गरेको थियो । जहाज अवतरण गरेपछि पनि प्राधिकरणले थप कारबाही प्रक्रिया अगाडि बढाएको थियो ।

– यस समाचारको श्रोत : Online Khabar हो ।