दमननाथ ढुंगानालाई कसले कसरी सम्झिए ?
२ मंसिर, काठमाडौं । पूर्वसभामुख दमननाथ ढुंगानाको निधन भएको छ। उनको निधनप्रति उच्च पदस्त व्यक्तिहरूले शोक प्रकट गरेका छन् ।
राष्ट्रपति रामचन्द्र पौडेलले ढुंगानाले लोकतान्त्रिक आन्दोलनमा पुर्याएको योगदान स्मरणीय रहेको बताएका छन् ।
उनले सामाजिक सञ्जालमा लेखेका छन्, ‘राजनीतिकर्मी, वरिष्ठ अधिवक्ता र नागरिक अगुवाका पहिचान बनाउनुभएका ढुंगानाले लोकतान्त्रिक आन्दोलनमा पुर्याउनुभएको योगदान सधैं स्मरणीय हुनेछ।’
प्रधानमन्त्री केपी शर्मा ओलीले ढुंगानाको योगदान सम्झिरहने बताएका छन् । ‘२०४६ सालमा प्रजातन्त्र पुनर्स्थापना भएपछि निर्वाचित पहिलो प्रतिनिधिसभाका सभामुख, मेरा मित्र दमननाथ ढुङ्गानाको निधनको खबरले अत्यन्त दुःखी छु’ ओलीले सामाजिक संजालमा लेखेका छन्, ‘नेपालमा मानव अधिकार रक्षाको आन्दोलन र संसदीय अभ्यासको प्रवर्द्धनमा उहाँको योगदान सम्झिरहेको छु ।’
सभामुख देवराज घिमिरेले ढंगानालाई आदर्श व्यक्तिको रुपमा चित्रित गर्दै सम्मान गरेका छन् । घिमिरेले निकालेको शोक वक्तव्यमा लेखेका छन्, ‘नेपालको संवैधानिक र संसदीय इतिहासमा उहाँको विशिष्ट योगदान रहेको छ। उहाँले नेपाली जनताले संसदीय मूल्य र मान्यताको पक्षमा निष्पक्ष भएर भूमिका निर्वाह गर्न सभामुखको रुपमा युगयुगसम्म सम्झनेछन्।’
पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले ढुंगानालाई नागरिक आन्दोलनका अगुवा भनेका छन् ।
‘नेपालको लोकतान्त्रिक आन्दोलनका महत्त्वपूर्ण व्यक्तित्व, पूर्व सभामुख, मानवअधिकार तथा नागरिक आन्दोलनका अगुवा आदरणीय दमननाथ ढुंगानाको निधनको खबरले दुःखी बनाएको छ’ प्रचण्डले भनेका छन्, ‘नेपाल र नेपाली जनताले देशको राजनैतिक, तथा सामाजिक परिवर्तनमा उहाँले पुर्याएको योगदानलाई सदैव सम्झिरहनेछन्।’
नेपाली कांग्रेसका सभापति शेरबहादुर देउवाले नेपालको लोकतन्त्र, मानवअधिकार र न्याय क्षेत्रमा ढुंगानाको योगदान महत्वपूर्ण रहेको बताएका छन् ।
‘नेपालको लोकतन्त्र, मानवअधिकार र न्याय क्षेत्रमा उहाँको योगदान महत्वपूर्ण थियो’ सभापति देउवाले सामाजिक संजालमा लेखेका छन् ।
पूर्व प्रधानमन्त्री बाबुराम भट्टराईले शान्तिप्रक्रियामा ढुंगानाले पुर्याएको योगदान सम्झिरहने बताए ।
उनले पनि सामाजिक सञ्जालमा लेखेका छन्, ‘नेपालको अग्रगामी राजनीतिक परिवर्तन, मानव अधिकार संरक्षण र विशेषतः शान्तिप्रक्रियामा वहाँले पुर्याउनु भएको योगदान हामीले सदैव सम्मानपूर्वक सम्झिरहनेछौं।’
– यस समाचारको श्रोत : Online Khabar हो ।