दयाहाङ र मिरुनाले छैटौंपटक जोडी बाँधेको ‘घरज्वाइँ’को कथा के हो ?

सोरो : एक्लो तारा

बिन्जुरी : एक्लै फुल्ने फूल

मगर समुदायका यी दुई शब्द यतिबेला फिल्म ‘घरज्वाइँ’मा समावेश छन् । यी दुई शब्दबाट निर्देशक अनिल बुढा मगरले प्रमुख पात्रको नामाकरण गरेका छन् । दयाहाङ सोरोको चरित्रमा छन् ।

मिरुना बिन्जुरीको रोलमा । पूर्वी रुकुमको तकसेरामा छायांकन गरिएको यो फिल्मले मगर समुदायमा घरज्वाइँ राख्ने परम्परालाई दर्शाउँछ । ‘आग्रे’ नामक डकुमेन्ट्री बनाएर चर्चामा आएका बुढाको यो पहिलो कथानक फिल्म हो ।

लगातार समुदायका कथामा देखिंदै आएका दयाहाङ र मिरुनाले यसपटक मगर समुदायको चरित्र बाँचेका छन् । ‘जारी’ र ‘कबड्डी’पछि यी दुईले कलाकारले स्क्रिन सेयर गरेको यो छैटौं फिल्म हो ।

काठमाडौंमा आयोजित पत्रकार सम्मेलनमा दयाहाङले ‘घरज्वाइँ’लाई विशुद्ध नेपाली फिल्म बताए । ‘फिल्मको मेनस्ट्रिम र साहित्यमा कमै उपस्थित भएको गजबको कथा आइपुगेको छ,’ राई भन्छन्, ‘यसले सबैलाई कनेक्ट गर्छ । प्रेम र पारिवारिक दृष्टिकोण सबै यसमा छन् ।’ पहिलोपटक कथा सुन्दा नयाँ कुराको लत बसेजस्तो महसुस भएको उनले बताए ।

मिरुनाले ‘घरज्वाइँ’ले सुन्दर प्रेमकथा समेटेको बताइन् । ‘यसमा धेरै कुराको मिश्रण छ । त्यो ठाउँमा जीवन कसरी चलेको छ, चल्थ्यो भन्ने कुरा देख्न पाइन्छ,’ उनले भनिन्, ‘तकसेरा गाउँमा खिच्दा झनै राम्रो भएको छ । आन्तरिक पर्यटन प्रवर्द्धन गर्ने कुरामा सुन्दर कथालाई फिल्मले बोकेको छ ।’

निर्देशक बुढाका अनुसार मगर समुदायमा ‘घरज्वाइँ’ राख्ने वा बस्ने चलन छ । छोरीका लागि ज्वाइँ योग्य छ कि छैन भन्ने थाहा पाउन घरज्वाइँ राख्ने वा बस्नुपर्ने यो समुदायको संस्कार हो । यो संस्कार फिल्म मार्फत आउनेछ । पत्रकार सम्मेलनमा अभिनेता राईले यो फिल्ममार्फत आफूले नयाँ कुरा जान्ने अवसर पाएको बताएका थिए ।

‘हामी प्रायः बुहारीमा यस्तो त्यस्तो गुण होस् भन्ने सोच्छौं । हाम्रो नेपाली समुदायमा धेरैले सोच्ने पनि यही नै हो । तर मगर समुदायमा अर्कै चलन रहेछ,’ दयाहाङले भने, ‘छोरी पाल्न सक्ने वा घरजम गरेर बस्नसक्ने क्षमता छ कि छैन भनेर घरज्वाइँ राख्ने चलन रहेछ । जुन मलाई पनि थाहा थिएन ।’

नेपाली समुदायले परम्परागत रुपमा सोचेभन्दा फरक कथा ‘घरज्वाइँ’ मार्फत देख्न र बुझ्न पाइने उनले बताए । सिनेमाको सुन्दरता नै यही भएको उनले बताए ।

को–एक्टरको रुपमा उनीहरु एकअर्काको प्रशंसा गरे । दयाहाङले मिरुनालाई आँटिली भन्दै प्रशंसा गरे । मिरुनाले दयाहाङलाई ‘गार्जन’को रुपमा आफूले लिएको बताइन् । ‘उहाँले जस्तोसुकै जटिल र कठिन परिस्थितीमा शान्त भएर काम गर्नुहुन्छ । सबैलाई मिलाएर अघि बढ्नुहुन्छ,’ मिरुनाले भनिन् ।

‘गाउँ आएको बाटो’, ‘जारी’, ‘मनसरा’देखि ‘घरज्वाइँ’मा पनि दयाहाङले काम गरेका छन् । उनी सँगै ‘जारी’, ‘मनसरा’देखि ‘घरज्वाइँ’मा मिरुना मगरले काम गरेकी छन् ।

निर्देशक मगरले आफूले माटोको कथा भन्ने प्रयास गरेको बताए । माटोको सुगन्ध फिल्ममा झल्किनुपर्ने र संस्कृतिको जगमा फिल्म बन्नुपर्ने भन्दै यही मान्यतालाई आफूले ‘घरज्वाइँ’मा अवलम्बन गरेको बताए ।

फिल्मलाई जनक घर्ती मगरले निर्माण गरेका हुन् । बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, विना थापा मगर, सोनाम लामा, विवेश बुढा मगर, सुनिल मगरको अभिनय छ ।

‘घरज्वाइँ’ शुक्रबार देशव्यापी प्रदर्शन तयारीमा छ ।

– यस समाचारको श्रोत : Online Khabar हो ।