दोधारा चाँदनी एकीकृत जाँच चौकी र सुक्खा बन्दरगाह निर्माण हुने
६ भदौ, काठमाडौं । सरकारले कञ्चनपुर दोधारा चाँदनीमा एकीकृत जाँच चौकी र सुक्खा बन्दरगाह निर्माण गर्ने भएको छ ।
अन्य क्षेत्रका तुलनामा आर्थिक विकासमा पछि परेको सुदूरपश्चिम क्षेत्रको समग्र आर्थिक विकासका लागि भारतसँग तथा भारत मार्फत हुने अन्तर्राष्ट्रिय व्यापार सहजीकरणका निम्ति आवश्यक व्यापारिक पूवार्धार निर्माण गर्ने क्रममा उक्त एकीकृत जाँच चौकी र सुक्खा बन्दरगाह निर्माण गर्ने भएको हो ।
वातावरण संरक्षण ऐन २०७६ तथा वातावरण संरक्षण नियमावली २०७७ ले आयोजना निर्माण र सञ्चालनपूर्व वातावरणीय अध्ययन प्रतिवेदन स्वीकृत गर्नुपर्ने कानुनी व्यवस्था अनुरूप १७ वैशाख २०८० मा दोधारा चाँदनीमा एकीकृत जाँच चौकी र सुक्खा बन्दरगाह निर्माणका लागि वन तथा वातावरण मन्त्रालयबाट वातावरणीय प्रभाव मूल्यांकन (ईआईए) प्रतिवेदन स्वीकृत भएको थियो ।
जस अनुसार दोधारा चाँदनी नगरपालिका–१ मा पर्ने गौरिशंकर मध्यवर्ती सामुदायिक वनको १ सय १७ हेक्टर वन क्षेत्रमध्ये ६३ हेक्टरमा आयोजना सञ्चालन प्रस्ताव गरिएको थियो ।
प्रस्तावित एकीकृत जाँच चौकी निर्माण भारतको आर्थिक तथा प्राविधिक सहयोगमा गर्ने गरी तत्कालीन प्रधानमन्त्री पुष्पकमल दाहालको जेठ २०८० मा भएको भ्रमण अवसरमा नेपाल र भारतबीच १ जुन २०२३ मा समझदारीपत्रमा हस्ताक्षर भएको थियो ।
यो आयोजना भारत सरकारको सहयोगमा निर्माण हुने भएकाले भारतबाट तयार गरिएको विस्तृत आयोजना प्रतिवेदन अनुसार निर्माण गरिने हुँदा आयोजना सञ्चालनका लागि प्रस्तावित कूल ६३ हेक्टर जग्गामध्ये पहिलो चरणमा ४२.३६ हेक्टरमात्र प्रयोग गरिने भएको छ ।
यसरी १७ वैशाख २०८० मा स्वीकृत ईआईए प्रतिवेदनको वातावरणीय व्यवस्थापन योजनामा परिमार्जन गर्नुपर्ने भएको छ । यसका लागि वन तथा वातावरण मन्त्रालयबाट १६ वैशाख २०८१ मा स्वीकृति प्रदान गरेको थियो ।
परिमार्जित वातावरणीय व्यवस्थापन योजना स्वीकृत भएसँगै सुदूरपश्चिम प्रदेशमा व्यापार सहजीकरणका लागि अत्याधुनिक सुविधा सम्पन्न व्यापार पूर्वाधार सहित एकीकृत जाँच चौकी र सुक्खा बन्दरगाह निर्माण हुन लागेको हो ।
यस आयोजना अन्तर्गत सडक, पार्किङ क्षेत्र, प्लेटफर्म, गोदामघर, तौलपुल, कन्टेनर यार्ड, यात्रु टर्मिनल, भन्सार, बैंक, पशुपन्छी/खाद्य प्रयोगशाला (क्वारेन्टिन) प्रशासनिक भवन लगायत संरचना निर्माण हुनेछ ।
आयोजना निर्माण गर्न करिब ५ अर्ब ७६ करोड रुपैयाँ लाग्ने अनुमान छ । यस परियोजना भारतको आर्थिक तथा प्राविधिक सहयोगमा निर्माण हुने नेपाल इन्टरमोडल यातायात विकास समितिका कार्यकारी निर्देशक आशिष गजुरेलले बताए ।
नेपालको राष्ट्रिय प्राथमिकता प्राप्त आयोजनाका रूपमा रहेको उक्त एकीकृत जाँच चौकी÷सुक्खा बन्दरगाह निर्माण सम्पन्न भई सञ्चालनमा आएपछि सुदूरपश्चिमको वृहत्तर पक्षको विकासमा कोशेढुंगा सावित हुने विश्वास लिइएको छ ।
– यस समाचारको श्रोत : Online Khabar हो ।