‘द होलटाइमर्स’को फस्टलुक सार्वजनिक, सिसन बानियाँ र नम्रता श्रेष्ठ बने निर्माता

काठमाडौं । अन्ततः प्रतीक्षित नेपाली फिल्म ‘द होलटाइमर्स’को फस्टलुक सार्वजनिक भएको छ । दशक लामो सशस्त्र द्वन्द्वको कथावस्तुमा बनेको यो फिल्म पाँच वर्षदेखि निर्माणाधीन थियो ।

छायांकन सकिन डेढ महिना बाँकी रहँदा निर्माण कम्पनी मिडिया पोर्टले तत्कालीन नेकपा माओवादी  छापामारको दृश्य दर्शाउने तस्वीर ल्याएको छ ।

पूजा गुरुङ र विभूषण बस्नेतले संयुक्तरुपमा निर्देशन गरिरहेको फिल्मको छायांकन अछामको रामारोशनमा भइरहेको छ । निर्माता प्रवीण कार्की टक्कीले डेढ महिनासम्म फिल्मको सुटिङ सकिने बताए ।

फस्टलुकमा फिल्मका कलाकारलाई तत्कालीन माओवादी छापामारको हुलियामा देख्न सकिन्छ । नाटकका चर्चित कलाकारहरु खगेन्द्र महरा, विनोदप्रकाश धामी, लक्ष्मी लिम्बू लगायतको यसमा अभिनय छ ।

टक्की मुख्य निर्माता रहेको यो फिल्ममा अभिनेत्री नम्रता श्रेष्ठ, भ्लगर सिसन बानियाँ, हलिउड फेसन डिजाइनर प्रबल गुरुङकी दिदी कुमुदुनी श्रेष्ठ, सोहम ढकाल, प्रणय पाण्डे, सुरज गिरी सहायक निर्माता हुन् । प्रस्तुतकर्तामा लेस फिल्म डु टम्बाउर छन् ।

फिल्मले दशक लामो सशस्त्र द्वन्द्वकालमा माओवादी युद्ध अभियानमा लागेका बालबालिकाको यात्राबारेको कथा भन्छ । ‘यो लडाइँको कथा भन्दा पनि सशस्त्र युद्धमा होमिएका बालबालिकाको भावना र सपनाको कथा हो,’ निर्माता टक्कीले भने । यो फिल्मलाई चिन्तन राजभण्डारीले छायांकन गरिरहेका छन् ।

निर्देशकद्वय गुरुङ र बस्नेतले यसअघि ‘दाद्या’, ‘घनटाउके’, ‘डम्बरे डेन्ड्राइट’जस्ता चर्चित छोटा फिल्म निर्देशन गरेका छन् । निर्माता कम्पनी मिडिया पोर्ट यसअघि ‘कबड्डी’मा एसोसिएट प्रोड्युसर रहिसकेको छ । विपिन कार्की स्टारर ‘नाका’ र ‘आमाखाण्डो’ पनि ब्यानरमा बनेका अन्य चर्चित फिल्म हुन् ।

सुरुमा फेस्टिभल र त्यसपछि सन् २०२५ मा हलमा रिलिज गर्ने योजना छ ।

– यस समाचारको श्रोत : Online Khabar हो ।