धमाधम क्रिकेटसँग जोडिंदै कलाकार
काठमाडौं । इण्डियन प्रिमियर लिग (आईपीएल)को कलाकारसँगको सम्बन्ध नयाँ होइन । आईपीएल क्लबमा बलिउड सेलिब्रेटीको ठूलै लगानी छ । शाहरुख खान, जुही चावला, प्रीति जिन्टा लगायत कलाकारले क्लबमा ठूलै लगानी गरेका छन् । लगानी मात्र हैन, त्यहाँका क्लबको प्रवर्द्धनमा कलाकार समेत सक्रिय हुन्छन् ।
नेपाल क्रिकेट संघले गर्न लागेको नेपाल प्रिमियर लिग (एनपीएल)का टोलीले पनि आफ्नो प्रवर्द्धनका लागि कलाकारको साथ खोजेका छन् । धमाधम उनीहरुले कलाकारलाई प्रवर्द्धन दूतको रुपमा नियुक्त गरिरहेका छन् ।
२१ कात्तिकमा कर्णाली याक्सले अभिनेत्री स्वस्तिमा खड्कालाई प्रवर्द्धन दूतको रुपमा चिनायो । खेलले समाज र राष्ट्रलाई सशक्तीकरण गर्ने मान्यताअनुसार आफू क्लबसँग जोडिएको स्वस्तिमा बताउँछिन् । आफू कर्णाली र खेलसँग जोडिएको र आफ्नो जीवनका असाध्यै निकट सम्बन्ध कर्णालीले जन्माएको उनको भनाइ छ ।
एनपीएलको अर्को क्रिकेट क्लब लुम्बिनी लायन्सले अभिनेता राजेश हमाललाई प्रवर्द्धन दूतको रुपमा नियुक्त गर्यो । क्लबमार्फत नेपाली क्रिकेटको प्रवद्र्धनमा आफूले काम गर्ने हमालले उक्त अवसरमा बताएका थिए । लामो समयपछि ‘नरसिंहा अवतार’बाट अभिनयमा पुनरागमन गरेका हमाल क्रिकेटसँग जोडिएका हुन् । हमालको इमेजले क्लबलाई चिनाउन मद्दत पुग्ने आशा लुम्बिनी लायन्सले लिएको छ ।
आइतबार आयोजित पत्रकार सम्मेलनमा विराटनगर किंग्सले अभिनेता दयाहाङ राईलाई दूतमा नियुक्त गरेको छ । एक वर्षका लागि उनी नियुक्त भएका हुन् ।
अभिनेता राईले एनपीएल नेपाली क्रिकेटमा नयाँ सुरुवात भएको बताए । ‘यसपालि तटस्थ बसेर एनपीएल हेरौं भन्ने थियो तर विराटनगरसँग जोडिएको छु’, उनले भने, ‘आफ्नै क्षेत्रको टिमसँग जोडिन पाउँदा खुसी छु ।’ उनले अगाडि थपे, ‘नेपाली क्रिकेट अहिले कहाँ पुगेको छ सबैलाई थाहा छ । क्रिकेटले हामी सबैलाई जोडेको छ ।’
आठ टोलीले भाग लिने एनपीएल मंसिर १६ देखि पुस ६ गतेसम्म आयोजना हुँदैछ ।
– यस समाचारको श्रोत : Online Khabar हो ।