धुर्कोटको विचित्र गुफामा पुग्न थाले विदेशी पर्यटक
६ चैत, गुल्मी । पर्यटकीय सम्भावना बोकेको गुल्मीको विचित्र गुफा पर्यटकको रोजाइमा पर्न थालेको छ ।
धुर्कोट गाउँपालिका-५ बस्तुस्थित विचित्र गुफाको अवलोकनका लागि विदेशी पर्यटकसमेत आउन लागेका छन् ।
गुफामा पछिल्लो १५ दिनमा विभिन्न देशका करिब ३० जना पर्यटकले गुफा अवलोकन गरेको तथ्यांक छ ।
केही दिनअघि १७ जनाको फ्रान्सेली नागरिकहरु त्यस विचित्र गुफाको अवलोकन गरेका थिए । त्यसपछि बेल्जियम, स्पेन र फ्रान्सका १२ जना पर्यटक गुफा हेर्न पुगेका थिए ।
गुफा अवलोकनका लागि आएका विदेशी पर्यटकलाई वडाध्यक्ष केशवराज भण्डारी र विचित्र गुफा संरक्षण तथा विकास समितका अध्यक्ष सन्तोष गौतम सुनारले स्वागत गरेका थिए ।
विदेशी पर्यटकलाई गुल्मीकै सिर्सेनीमा रहेको अरविन्दा आश्रमका स्वामी रामचन्द्रदासले अवलोकन गराउन सहयोग गरेका छन् ।
गुफा अवलोकन पछि वेल्जियमकी सुर्यामा र फ्रान्सका पियरले गुफा राम्रो लागेको प्रतिक्रिया दिए । उनीहरुले गुफा एउटा शान्ता ठाउँ रहेकाले घुम्नका लागि उपयुक्त स्थान रहेको बताएका थिए ।
यस्ता गुफा आफ्ना देशहरुका रहेपनि प्राकृृतिक रुपमा रहेका आकृतिहरु अत्यन्तै राम्रो लागेको उनीहको प्रतिक्रिया थियो ।
गुफामा यसअघि फाटफुट रुपमा विदेशी नागरिकहरु गुफा अवलोकन भ्रमणमा आए पनि ठूलो समहूमा आउन थालेको यो पहिलो पटक हो ।
विचित्र गुफाको भौतिक विकासले पर्यटन विकास बढ्दै जान थालेको गुफा विकास समितिका अध्यक्ष सुनारले बताए ।
पछिल्लो समय आन्तरिक तथा बाहृय पर्यटक भित्र्याउनका लागि विभिन्न संरचना निर्माण कार्य पनि हुँदै आएको बताए ।
गुफाभित्र विदेश पर्यटक
यस गुफालाई पर्यटन उद्योगको रुपमा विकास गर्न थालिएको सुनारले बताए । २०४५ सालमा ढेंडु लखेट्दै जाने क्रममा पत्ता लागेको त्यस गुफा महत्वपूर्ण राष्ट्रिय सम्पदाका रुपमा स्थापित हुन पुगेको स्थानीय शिक्षक कृष्णप्रसाद भण्डारीले बताए ।
पछिल्लो समेत स्थानीयले नै समिति बनाएर केही रेखदेख र संरक्षण गर्दै आएको बताए । गुफासम्म पुग्ने मोटरबाटो स्तरीय नहुँदा गाह्रो पर्ने गरेको त्यहाँ पुग्नेहरु बताउँछन् ।
हाल गुफा क्षेत्रमा कच्ची बाटो, नजिकै पिननिक खानेहरुको लागी प्रतिक्षालयसँगै शौचालयहरु निर्माण गरिएको धुर्कोट गाउँपालिका वडानम्बर ५ का अध्यक्ष केशव भण्डारीले बताए ।
गुफा अवलोकनका लागि अहिले दैनिक १०० जनासम्म र कहिलेकाही विभिन्न समूहमा घुम्न जाने गरेको भण्डारीले बताए ।
अहिले गुफा नजिकै सूचना केन्द्र भवन निर्माण भइरहेको छ । जसबाट विचित्र गुफाको सम्पूर्ण जानकारी दिने सूचना केन्द्रको भवन, गुफा नजिकै छल्दिदेखि गुफासम्म जाने पैदल मार्ग, बीचबीचमा प्रतिक्षालय, खानेपानी, शौचालय लगायतका पूर्वाधार निर्माण भएको गाउँपालिका अध्यक्ष भुपाल पोखरेलले बताए ।
विचित्र गुफा जाने बाटो ।
गुफामा फेला परेका आकृतिलाई नरसिंहवतार, कच्छ्यावतार, गोपीकृष्ण, जटायु, शिवलिङ्गलगायत नामाकरण गरिएको छ ।
गुफाभित्रका विभिन्न आकृतिहरु, कलात्मक वस्तुहरु, धार्मिक आस्था जगाउने मनमोहक दृष्यहरुले विचित्र गुफा साँच्चिकै विचित्र रहेको अध्यक्ष पोखरेलले बताए ।
विचित्र गुफा कुल १८५ मिटर रहेको छ । गुफाभित्र पारदर्शी ढुङ्गा, शिवलिङ्ग, गाइका थुन र निकै कलिला चट्टानहरु रहेका छन् ।
अनुसन्धान भए सम्भवतः नेपालकै ठुलो गुफा हुन सक्ने यसको अझै धेरै कुरा पत्ता लागिनसकेको दाबी गरिएको छ ।
गुफाभित्र सानाठुला गरी ११ वटा धार्मिक ग्रन्थमा आधारित कक्षहरु छन् । गुफाभित्रको उचाइ पनि कतै निहुरिएर पस्नु पर्ने त कतै सभाहल नै बन्नेखालको छ ।
हिन्दु धर्ममा आधारित विभिन्न प्राकृतिक संरचना रहेको त्यस गुफा नाम जस्तै विचित्रको छ ।
गुफा अवलोकन गर्न आएका विदेशी पर्यटक ।
– यस समाचारको श्रोत : Online Khabar हो ।