नटिङहम फरेस्टविरुद्ध चेल्सीको पुनरागमन बराबरी

२० असोज, काठमाडौं । प्रिमियर लिगमा चेल्सीले दश खेलाडीमा समेटिएको नटिङहम फरेस्टसँग १-१ को बराबरी खेलेको छ । खेलमा नटिङहमले पहिले अग्रता लिएपनि चेल्सीले पुनरागमन गर्दै बराबरी खेलेको हो ।

खेलको पहिलो हाफ गोलरहित बराबरीमा रोकिएको थियो । दुवै टोलीले दोस्रो हाफमा गोल गरेका थिए ।

खेलको ४९औं मिनेटमा क्रिस उडले गोल गर्दै नटिङहम फरेस्टलाई अग्रता दिलाएका थिए । तर ५७औं मिनेटमा नोनी मादुएले चेल्सीका लागि बराबरी गोल फर्काए ।

७८औं मिनेटमा जेम्स वार्ड प्रोवस रातो (दोहोरो पहेँलो) कार्ड पाउँदै मैदान बाहिरिएपछि नटिङहम दश खेलाडीमा समेटिएको थियो ।

तर चेल्सीले त्यसको फाइदा उठाउन सकेन र अंक बाड्यो ।

बराबरीपछि चेल्सी ७ खेलबाट १४ अंक जोडेर चौथो स्थानमा उक्लेको छ । नटिङहम समान खेलबाट १० अंकसहित नवौँ स्थानमा छ ।

त्यसअघि म्यानचेष्टर युनाइटेड र एस्टन भिल्लाले गोलरहित बराबरी खेल्दै अंक बाडेका थिए । एस्टन भिल्ला ७ खेलबाट १४ अंकसहित पाँचौ स्थानमा छ । म्यानचेष्टर युनाइटेड ७ खेलबाट ८ अंकसहित १४औं स्थानमा छ ।

– यस समाचारको श्रोत : Online Khabar हो ।