नवलपुरमा छैटौं राइनाे संरक्षण गाेल्डकप सुरु, बिजेताले ८ लाख पाउने
२७ माघ, पोखरा। खेलकुदमार्फत गैंडाको संरक्षणमा जनचेतना जगाउने उद्देश्यका साथ शनिबारबाट नवलपुरको कोल्हुवामा छैठाैं राइनो संरक्षण गोल्डकप सुरु भएको छ ।
राइनो संरक्षण गोल्डकपको उद्घाटन खेलमा सेन्टर कलेज फोर ब्रदर्स भुमही विजयी भएको छ । वीरगञ्ज युनाइटेड क्लबलाई २–१ ले हराउँदै सेन्टर कलेज फोर ब्रदर्सले प्रतियोगितामा जित निकालेको हो ।
खेलमा फोर ब्रदर्सका लागि विनोद केवट र फागुराम चौधरीले समान १–१ गोल गरे । खेलको अन्तिम ४ मिनेटमा वीरगञ्ज यूनाइटेडका विकास चौधरीले एक गोल फर्काएका थिए । तर उनले हारलाई टार्न सकेनन् ।
प्रतियोगिताअन्तर्गत आइतबार हनामी बीएफसी चितवन र गण्डकी प्रदेशको फुटबल टिमबीच प्रतिस्पर्धा हुने आयोजकले जनाएको छ । राइनो क्लब, मध्यविन्दु–४ नवलपुरको आयोजनामा जारी प्रतियोगिताको विजेताले उपाधिसहित नगद ८ लाख रुपैयाँ हात पार्नेछ भने उपविजेताले ४ लाख रुपैयाँ प्राप्त गर्नेछ ।
प्रतियोगितामा नेपाल आर्मी, सेन्टर कलेज फोर ब्रदर्स, २८ बिगाहा, लुम्बिनी प्रदेश, संकटा क्लब, मछिन्द्र क्लब, हनामी बीएफसी क्लब, गण्डकी प्रदेश, बागमती प्रदेश, एपीएफ र पुलिस क्लब सहभागी छन् ।
प्रतियोगिताको उद्घाटन गण्डकी प्रदेशकी सामाजिक विकास तथा स्वास्थ्यमन्त्री सुशीला सिम्खडाले गरेकी थिइन् । प्रतियाेगिता उद्घाटन गर्दै उनले गण्डकी प्रदेशको खेल विकासका लागि प्रदेश सरकार प्रतिवद्ध रहेकाे बताइन् ।
उनले यस प्रकारका प्रतियोगिताहरुलो समाजमा वन्य क्षेत्रको संरक्षणमा जनचेतना जगाउन भूमिका खेल्ने विश्वास व्यक्त गरिन् ।
– यस समाचारको श्रोत : Online Khabar हो ।