केपी ओली कप : एनआरटीलाई पेनाल्टी सुटआउटमा हराएर मछिन्द्रले रक्षा गर्यो उपाधि
१९ फागुन, काठमाडौं । एनआरटीलाई पेनाल्टीसुटआउटमा पराजित गर्दै मछिन्द्र एफसीले शनिवार दोस्रो संस्करणको केपी ओली कपको उपाधि जितेको छ ।
त्रिपुरेश्वरस्थित दशरथ रंगशालामा भएको फाइनल मछिन्द्रले एनआरटीलाई पेनाल्टीसुटआउटमा ५-४ ले पराजित गर्दै उपाधि रक्षा गरेको हो । पहिलो संस्करण पनि मछिन्द्रले जितेको थियो ।
पेनाल्टीसुटआउटमा अन्तिम पेनालटी हानेका एनआरटीका विवेक गुरुङको प्रहार बाहिरिएपछि मछिन्द्र च्याम्पियन बन्यो ।
निर्धारित समयको खेल गोलरहित बराबरीमा सकिएपछि खेलको निर्णय सिधै पेनाल्टीसुटआउटबाट भएको हो ।
मछिन्द्रका सनिश श्रेष्ठ, दिवाकर चौधरी, स्टेफन समिर विनोङ, क्रिस्टोफर र देवेन्द्र तामाङले पेनाल्टीमा गोल गरे ।
एनआरटीका लागि भने सरोज तामाङ, सञ्जि विष्ट, अभिषेक लिम्बू र मोहित गुरुङले गोल गरे । विवेक गुरुङको प्रहार भने पोष्ट भन्दा बाहिर गयो ।
च्याम्पियन मछिन्द्रले नगद ११ लाखसहित उपाधि जितेको छ । यस्तै उपविजेता एनआरटीले ५ लाख पायो । प्रतियोगितामा ७ ए डिभिजन क्लब, भारतीय दुई क्लब दिल्ली एफसी र मानेभऽज्याङ एफसी तथा आयोजक टिम गरी १० टिमको सहभागिता थियो ।
– यस समाचारको श्रोत : Online Khabar हो ।