नुमाको अवतारमा उषाको सौन्दर्य (तस्वीर)
काठमाडौं । फिल्म प्रिमियर समारोह सेलिब्रेटीको लागि फेसनको हिसाबले खास अवसर हुने गर्छ । अभिनेत्री उषा रजकको लागि ‘गाउँ आएको बाटो’को प्रिमियर यस्तै खास रह्यो ।
जहाँ उनले नवीन सुब्बाको अघिल्लो कथानक फिल्म ‘नुमाफुङ’की शीर्ष चरित्र नुमाको अवतारमा आफूलाई पेश गरिन् । लिम्बु पहिरन मेख्ली, शीरफूल, यार्लिङ, कण्ठमा उनले आफूलाई सजाएकी थिइन् ।
उषाले यो पहिरनलाई निर्देशक सुब्बाप्रतिको ट्रिब्युट भएको बताइन् । ‘नुमाफुङ’सँग उनको संवेदना पनि जोडिएको छ । त्यो के भने- उनलाई म्युजिक भिडियोमा ब्रेक दिने निर्देशक आलोक नेम्बाङले उक्त फिल्ममा अभिनय पनि गरेका थिए ।
उनै आलोकले उषालाई दुई दशकअघि त्यो फिल्म देखाएका थिए । अहिले आलोक भौतिक संसारमा छैनन्, तर उषाको सम्झनामा उनी बाँचिरहेका छन् । यी यादलाई दर्शाउन उषाले ‘गाउँ आएको बाटो’को प्रिमियर छनोट गरिन् ।
यो पहिरन सीमान्तकृत तुल्याइएका आदिवासी समुदायप्रतिको सम्मान भएको पनि उनले बताइन् । ‘जुन समुदायलाई किनारामा पारिन्छ, त्यो समुदायप्रतिको रेस्पेक्टपनि हो यो’ उनले भनिन्, ‘हरेक एक्ट्रेसलाई प्रिमियरमा बेहुलीजस्तै बनेर पुगौं भन्ने रहर हुन्छ । मलाई पनि त्यस्तै रहर थियो । मेरो सोचमा नुमा आइपुग्यो ।’
‘कुसुमे रुमाल २’ डेब्यु एक्ट्रेस उषा पछिल्लो समय रुचाइएकी अभिनेत्री हुन् । ‘ब्रेन विथ ब्युटी’ उषाले इकु, कथा, कठपुतली र जुलेबीमा अभिनय गरेकी छन् । निकट भविष्यमा फिल्म निर्माण र निर्देशन गर्ने उनको तयारी छ ।
तस्वीर सौजन्य: सुरज धामी
– यस समाचारको श्रोत : Online Khabar हो ।