नेटफ्लिक्सले ल्यायो ‘सिक्वड गेम’ सिजन २ को रोचक ट्रेलर
काठमाडौं । नेटफ्लिक्सले बहुप्रतीक्षित सिरिज ‘स्क्विड गेम’ सिजन २ को ट्रेलर सार्वजनिक गरेको छ । पुस ११ गतेबाट स्ट्रिमिङ तयारीमा रहेको यो सिरिज नेटफ्लिक्सकै प्रतीक्षित सिरिजमध्ये पर्छ । यसको अघिल्लो सिजनले नेटफ्लिक्स इतिहासमा सर्वाधिक हेरिने रेकर्ड राखेको थियो ।
ट्रेलरमा ४५६ जना खेलाडी जीवन र मृत्युको खेल खेल्न एरिनामा भेला भएको र संघर्ष गरेको देखाएको छ । उनीहरु घरमा लागेको ऋण तिर्न र जीवन समृद्ध बनाउने सपना बोकेर मैदानमा उत्रिएका छन् । तर आँखैअघि मृत्यु निश्चित छ ।
सिरिजका मुख्य पात्र ली–जंग जेले रेड लाइट र ग्रीन लाइटका चरणमार्फत अन्य ४५६ खेलाडीलाई जोगाउने प्रयास गर्छन् । तर हावामा गोलीहरू उड्न थालेपछि एकअर्कालाई बेवास्ता गरेको देखिन्छ ।
नयाँ ट्रेलरमा सबै खेलाडी घातक चुनौतीबाट आफूलाई जोगाउन संघर्ष गरेको देखिन्छ । लीसँगै सिजन २ मा वाइ हा–जुन र ली–ब्युङ हुन पनि आफ्ना चरित्रमा फर्किएका छन् । निर्माताले स्विक्ड गेमको तेस्रो सिजन अन्तिम हुनसक्ने बताइरहेका छन् तर यसबारे औपचारिक पुष्टि छैन ।
– यस समाचारको श्रोत : Online Khabar हो ।