अर्जुन कुमारको दाबी : यसअघि जति फिल्म बनाएँ, तीमध्ये ‘सानो संसार’ उत्कृष्ट

काठमाडौं । निर्माता अर्जुन कुमार यतिबेला १६ वर्ष पुरानो हिट फिल्मकै नाममा नयाँ फिल्म लिएर फर्किएका छन् । पछिल्लो फिल्म ‘सानो संसार’को कथा प्रेम र रोमान्सभन्दा मध्यमवर्गीय परिवारको संघर्षको कथामा आधारित छ ।

फिल्म रिलिज मिति नजिकिंदै जाँदा निर्माता अर्जुन कुमारले मंगलबार पत्रकार सम्मेलन गर्दै आफूले अहिलेसम्म बनाएका फिल्मभन्दा ‘सानो संसार’ उत्कृष्ट बनाएको दाबी गरे । अर्जुन कुमारले यसअघि द युगदेखि युगसम्म, चपली हाइट, फाटेको जुत्ता र फिट्किरी जस्ता फिल्म बनाएका थिए ।

पत्रकार सम्मेलनमा उनले भने, ‘मैले यसअघि जति फिल्म बनाएँ, तीमध्ये उत्कृष्टमा सानो संसार पर्छ ।’ रोचक कुरा के छ भने ‘सानो संसार’ उनको करिअरमा प्रिमियर समारोह हुने पहिलो फिल्म पनि पर्छ ।

‘फिल्म राम्रो छ भनेपछि मलाई प्रिमियरको आँट आएको हो । सेन्सर बोर्डका सदस्यले पनि फिल्म हेर्दा मनपराउनुभयो’ उनले भने, ‘मैले यो फिल्ममा आफ्नो कथा देखें, जसले गर्दा मलाई लगानी गर्न र जोखिम मोल्न पनि सजिलो भयो ।’

फिल्ममा सबैजसो कलाकार नयाँ छन् । यसअघि नाटक र सिरियलमा नाम बटुलेकी सीतादेवी तिमल्सिनाको यो डेब्यु फिल्म हुनेछ । अस्कर कलेजमा फिल्म अध्ययन गर्दै आएकी अञ्जसा रिजाल हुन् या दर्जनौं नाटकमा अभिनय गरेकी अनु दाहालको यो डेब्यु फिल्म हुनेछ ।

पत्रकार सम्मेलनमा अन्य कलाकारले फिल्मको कथा दर्शकसँग जोडिने बताए । ‘मध्यम वर्गको कथा प्रायः फिल्ममा आउँदैन । यो कुरा मिसिङ भइरहेको थियो’ अन्जसाले भनिन् । अनुले आफूले निर्वाह गरेको चरित्रमा युवा दर्शक जोडिने बताइन् ।

सिद्धार्थ पुडासैनीले निर्देशन गरेको यो फिल्मको कार्यकारी निर्मातामा माधव वाग्ले छन् । राज पंगेनी शर्मा, शिशिर सिवाकोटी, सरिता भण्डारी, जीवन गौतम लगायतको समेत यो फिल्ममा अभिनय गरेका छन् ।

– यस समाचारको श्रोत : Online Khabar हो ।