आरसीटीको पहिलो ग्रासरुट कार्यक्रम सकियो, फेरि सञ्चालन गर्ने
२६ जेठ, काठमाडौं । अन्नपूर्ण आरसीटी क्लबले नयाँ तथा युवा फुटबल खेलाडी उत्पादनका लागि अझ परिस्कृत ग्रास रुटस्तरका प्रशिक्षण कार्यक्रम गर्ने भएको छ ।
क्लबले सञ्चालन गरेको पाँच महिना लामो पहिलो चरणको ग्रास रुट कार्यक्रम शनिबार समापन गरेको छ । त्यसको समापन समारोहमा सहभागीलाई प्रमाणपत्र र पदक प्रदान गरिएको थियो ।
कुल १३० खेलाडीको सहभागिता रहेको प्रशिाक्षण कार्यक्रममा २२ बालिका थिए । आठ वर्षदेखि १४ वर्षसम्मका खेलाडीको सहभागिता रहेको कार्यक्रमलाई नौ फुटबल प्रशिक्षकले सञ्चालन गरेका थिए ।
त्यसमा मुख्य प्रशिक्षक विराटकृष्ण श्रेष्ठ रहेका थिए । समापन समारोहमा क्लबका अध्यक्ष सुरेशकाजी शाक्यले थप ग्रास रुट कार्यक्रम गर्ने योजना रहेको बताए ।
काठमाडौंमा फुटबल खेलाडी उत्पादन गर्ने उद्देश्यले आरसीटीले कार्यक्रमको आयोजना गरेको हो । काठमाडौं महानगरको सहयोग तथा लैनचोर युवा क्लब र बाँसबारी क्लबको सहकार्यमा भएको कार्यक्रम गत वर्षको माघ महिनामा सुरु भएको थियो ।
आरसीटी नेपालको घरेलु फुटबलमा सर्वाधिक सफल क्लबमध्ये एक हो ।
– यस समाचारको श्रोत : Online Khabar हो ।