नेपाल एमेच्योर ओपनको उपाधि भारतका शातलाई

१८ जेठ, काठमाडौं । भारतका शात मिश्राले नेपालका सदभाव आचार्यलाई ४ स्ट्रोकले हराउँदै १०औं नेपाल एमेच्योर ओपनको उपाधि जितेका छन् ।

गोकर्ण गल्फ क्लबमा आज सम्पन्न खेलको तेस्रो तथा अन्तिम दिन शातले ३-ओभर ७५ खेल्दै समग्रमा ८-अन्डर २ सय ८ को स्कोर खडा गरे । नेपालका सदभावले आज ३-अन्डर ६९ खेले र समग्रमा ४-अन्डर २ सय १२ को स्कोरमा दोस्रो स्थान हासिल गरे।

डिफेन्डिङ च्याम्पियन भारतका सुमित कोटवालले ५-अन्डर ६७ सहित समग्रमा ३-अन्डर २ सय १३ सहित तेस्रो स्थानमा समेटिए।

अन्तिम १८ होलको सुरूवात गर्दा शात नेपालका राहुल विश्वकर्म भन्दा ६ स्ट्रोकले अगाडि थिए। राहुलले चार होलको समाप्तिमा अग्रता तीन स्ट्रोकमा झारिसकेका थिए । तर यसपछि राहुलले सातौं र नवौं होलमा डबल बोगीको सामना गर्दा आठौं होलमा पनि एक सट खेर फालेपछि उपाधि जित्ने सम्भावना समाप्त भएको थियो ।

शातले भने फ्रन्ट नाइन १-ओभर ३७ मा सकाए । तेस्रो र सातौं होलमा एक-एक सट बचाउँदा दोस्रो, चौथो र आठौं होलमा बोगी प्रहार गरे । ब्याक नाइन २-ओभर ३८ मा सकाए । १२औं होलको बर्डी विरूद्ध १३औं, १४औं र १७औं होलमा बोगी खेपे ।

सदभावले आज फ्रन्ट नाइन २-अन्डर ३४ मा सकाए । तेस्रो र पाँचौ होलमा बर्डी प्रहार गरे भने सातौं होलमा इगलको सफलता प्राप्त गरे । आठौं होलमा डबल बोगीको सामना गरे । यसपछि ब्याक नाइनमा चार वटा बर्डी प्रहार गरे । ११औं, १३औं, १४औं र १८औं होलमा एक-एक सट बचाए । तर १२औं, १६औं र १७औं होलमा बोगी प्रहार गर्दा ब्याक नाइन १-अन्डर ३५ मा सकाए ।

सुमितले तेस्रो र पाँचौं होलमा बर्डी प्रहार गर्दै २-अन्डर ३४ मा फ्रन्ट नाइनको खेल सकाए। बोगी फ्री स्कोर निकालेका उनले ११औं, १४औं र १६औं होलमा एक-एक सट बचाउँदै ब्याक नाइन ३-अन्डर ३९ मा पूरा गरे ।

महिलातर्फ श्रीलंकाकी काया दलुवाटेले आज ४-अन्डर ६८ सहित समग्रमा ६-अन्डर २ सय १० को शानदार स्कोरमा भारतकी दिया क्रिस कुमारलाई ११ स्ट्रोकको फराकिलो अन्तरमा हराउँदै उपाधि जितिन् । १-ओभर ७३ मा अन्तिम दिनको खेल पुरा गर्दै समग्रमा ५-ओभर २ सय २१ सहित दिया दोस्रो भइन् । ५-ओभर ७७ को स्कोर बनाएकी अनाथी विवेक समग्रमा १२-ओभर २ सय २८ सहित तेस्रो भइन् ।

कायाले पहिलो, तेस्रो र छेटौं होलमा बर्डी र चौथो होलको डबल बोगीले फ्रन्ट नाइन १-अन्डर ३५ मा सकाइन् । १०औं र १४औं होलमा बर्डी र ११औं होलको इगलको सफलता प्राप्त गरिन् । १२औं होलको बोगीले ब्याक नाइन ३-अन्डर ३३ मा पूरा गरिन् । अनाथीले दोस्रो होलको बर्डी र छैटौं होलको बोगीले फ्रन्ट नाइन इभन-पार ३६ मा पूरा गरिन् । यसपछि १३औं होलमा बोगी तथा १६औं र १८औं होलको डबल बोगीले ब्याक नाइन ५-ओभर ४१ मा पूरा गरिन् ।

५४ होल तीन दिने प्रतियोगितामा नेपाल, भारत, श्रीलंका, बंगलादेश र भुटान गरी पाँच राष्ट्रका पुरूषतर्फ ५२ र महिलातर्फ १३ गरी कुल ६५ खेलाडीले सहभागिता थियो ।

नेपाल गल्फ संघको आयोजनामा भएको प्रतियोगितामा राष्ट्रिय खेलकुद परिषद्, नेपाल पर्यटन बोर्ड, गोकर्ण फरेस्ट गल्फ रिसोर्ट र होटल रोयल सिंङ्गीको सहयोग रहेको थियो ।

विजयी खेलाडीहरुलाई युवा तथा खेलकूद मन्त्री विराजभक्त श्रेष्ठ तथा संघीय सांसद निशा डांगीले पुरस्कार प्रदान गरे । मन्त्री श्रेष्ठले सरकार र नेपाल गल्फ संघ मिलेर गल्फलाई नयाँ उचाइमा पुर्‍याउनेतर्फ काम भइरहेको बताए । उनले गल्फ कोर्षको लागि छिट्टै जग्गा उपलब्ध गराउने प्रतिवद्धतासमेत व्यक्त गरे ।

– यस समाचारको श्रोत : Online Khabar हो ।