पाकिस्तानसँगको पहिलो टी-२० खेलमा अस्ट्रेलियाको जित

२९ कात्तिक, काठमाडौं । पाकिस्तानसँगको टी-२० अन्तर्राष्ट्रिय क्रिकेट श्रृंखलामा अस्ट्रेलियाले विजयी सुरुवात गरेको छ । बिहीबार भएको पहिलो खेलमा अस्ट्रेलियाले २९ रनको जित निकालेको हो ।

वर्षाले प्रभावित भएर ७ ओभरमा छोट्याइएको खेलमा अस्ट्रेलियाले दिएको ९४ रनको लक्ष्य पछ्याएको पाकिस्तानले ७ ओभरमा ९ विकेट गुमाएर ६४ रन मात्र बनाउन सक्यो ।

पाकिस्तानका लागि अब्बास अफ्रिदीले अविजित रहँदै सर्वाधिक २० रन बनाए । हासिबुल्लाह खानले १२ तथा शाहिन अफ्रिदीले ११ रन बनाए । अन्यले दोहोरो अंकमा रन बनाउन सकेनन् ।

अस्ट्रेलियाका नेथन एलिसले २ ओभरमा ९ रन दिएर ३ विकेट लिए । त्यस्तै जेभियर बार्टलेटले २ ओभरमा १३ रन दिएर ३ विकेट लिए । त्यस्तै एडम जाम्पाले १ ओभरमा ११ रन दिएर २ विकेट लिए । स्पेन्सर जोनसोनले १ विकेट लिए ।

त्यसअघि टस हारेर पहिले ब्याटिङ गरेको अस्ट्रेलियाले निर्धारित ७ ओभरमा ४ विकेट गुमाएर ९३ रन बनाएको थियो । अस्ट्रेलियाका ग्लेन म्याक्सवेलले १९ बल खेल्दै सर्वाधिक ४३ रन बनाए भने मार्कस स्टोइनिस ७ बलमा २१ रनमा अविजित रहे ।

पाकिस्तानका लागि अब्बास अफ्रिदीले २ विकेट लिए भने शाहीन अफ्रिदी र नसीम साहले १-१ विकेट लिए ।

योसँगै तीन खेलको टी-२० आई श्रृंखलामा अस्ट्रेलियाले १-० को अग्रता बनाएको छ । दोस्रो खेल शनिबार हुनेछ ।

यसअघि भएको एकदिवसीय श्रृंखलामा पाकिस्तान २-१ ले विजयी भएको थियो ।

– यस समाचारको श्रोत : Online Khabar हो ।