‘पूर्णबहादुरको सारंगी’ हेरेपछि भट्टराई : विजय बरालको अहिलेसम्मकै उत्कृष्ट अभिनय

काठमार्डौ । पूर्वप्रधानमन्त्री बाबुराम भट्टराईले प्रदर्शनरत ‘पूर्णबहादुरको सारंगी’लाई अभिनेता विजय बरालको अहिलेसम्मकै उत्कृष्ट अभिनय भएको फिल्मको रुपमा आफूले बुझेको बताएका छन् ।

प्रायः फिल्म हेर्न हलमा पुगिरहने नेता भट्टराई सरोज पौडेल निर्देशित फिल्म हेर्न शुक्रबार दिउँसो राजधानीको एक हलमा पुगेका थिए जहाँ उनले फिल्मले आफूलाई प्रभावित तुल्याएको बताए ।

फिल्म हेरिसकेपछि नेता भट्टराई सामाजिक संजालमा लेख्छन्, ‘ऐतिहासिक रूपले नेपाली समाजमा गीतसंगीत क्षेत्रका अगुवा तर उल्टै सबभन्दा उत्पीडित र अपहेलित गन्धर्व (गाइने) परिवारको मार्मिक संघर्षको कथामा आधारित यो फिल्म सबै सहृदयी मनहरूले हेर्नैपर्छ । पटकथा, छायांकन, संगीत, अभिनय प्रशंशायोग्य छन् । मैले बुझेसम्म मुख्य भूमिकामा रहेका विजय बरालको यो अहिलेसम्मकै उत्कृष्ट अभिनय हो ।’

फिल्म वस्तुपरक, मार्मिक र कारुणिक भएको भट्टराईको भनाइ छ । संविधानले दलित मुक्तिको व्यवस्था गरेपनि अहिलेपनि यो कार्यान्वयन हुन नसकेको बताउँदै भट्टराईले दलित मुद्दालाई फिल्मले उचित ढंगले प्रस्तुत गरेको बताए ।

अभिनेता जितु नेपालले ‘ह्यारीकी प्यारी’ को-स्टारसँगको अभिनय सम्झना गर्दै फिल्मले आफूलाई रुवाएको बताए । हास्य कलाकार किरण केसी रातामकैले विजयको अभिनयको खुलेर प्रशंसा गरे । फिल्म निर्देशक दिनेश राउतले विजय बरालको अभिनय र पटकथा पक्ष उत्कृष्ट रहेको बताए ।

शीर्ष कलाकारको रुपमा अभिनेता बरालको यो पहिलो फिल्म हो । प्रदर्शनको दोस्रो दिन शनिबार फिल्मले देशब्यापी सुखद कमाइ गरेको छ । बलियो वर्ड अफ माउथ प्राप्त गरेको खण्डमा तिहारको ५ दिने सार्वजनिक बिदामा यो फिल्मलाई बक्सअफिसमा लाभ मिल्ने विश्वास गरिएको छ ।

– यस समाचारको श्रोत : Online Khabar हो ।