पोखरा एभेन्जर्सका प्रशिक्षक राजिव कुमार नेपाल आइपुगे

४ मंसिर, काठमाडौं । नेपाल प्रिमियर लिग (एनपीएल) का लागि पोखरा एभेन्जर्सका मुख्य प्रशिक्षक राजिव कुमार नेपाल आइपुगेका छन् । भारतीय प्रशिक्षक कुमार सोमबार राति पोखरा आइपुगेको पोखरा एभेन्जर्सले जनाएको छ ।

इन्डियन प्रिमियर लिग (आईपीएल)को सफल टोली चेन्नाई सुपर किंग्सको फिल्डिङ प्रशिक्षक रहिसकेका कुमार पहिलोपटक नेपालको फ्रेन्चाइज लिगको प्रशिक्षक बनेर आएका हुन् । उनी गत सिजन चेन्नाईको फिल्डिङ प्रशिक्षकको भूमिकामा थिए ।

पोखराको सहायक प्रशिक्षकमा नेपालकै रिजन प्रजु छन् भने दक्षिण अफ्रिकी लेजेन्ड तथा फिल्डिङका बादशाह जोन्टी रोड्स मेन्टरको भूमिकामा छन् । राजीव कुमारको आगमनले पोखरा प्रशिषण टोली बलियो हुने र यसले टिमलाई धेरै फाइदा पुग्ने टिमको विश्वास छ ।

यसैगरी अष्ट्रेलियामा बस्दै उतै क्रिकेट खेलिरहेका सुनाम गौतम पनि नेपाल आइपुगेका छन् । उनले पोखरा एभेन्जर्सबाट एनपीएल खेल्नेछन् ।

पोखराको मार्की प्लेअरमा नेपाली राष्ट्रिय टिमका ओपनर कुशल भुर्तेल छन् । यस्तै विदेशी खेलाडीमा नेदरल्याण्ड्सका बास डे लिड, वेष्ट इन्डिजका रेमोन रेइफर, अमेरिकाका आन्द्रेस गौस, इंग्ल्याण्डका म्याट क्रिटले, स्कटल्याण्डका माइकल लिस्क छन् । यसअघि अनुबन्ध भएका एण्डरसन फिलिपे भने नआउने भएका छन् ।

पोखरा एभेन्जर्सले आफ्नो पहिलो खेल मंसिर १८ (डिसेम्बर ३) मा चितवन राइनोजसँग खेल्नेछ ।

– यस समाचारको श्रोत : Online Khabar हो ।