प्युठानको बाग्दुला–मच्छी सडक आजदेखि २८ मंसिरसम्म दैनिक ११ घण्टा बन्द
५ मंसिर, प्युठान । प्युठानको बाग्दुला–मच्छी सडकखण्ड आजदेखि २४ दिनसम्म दैनिक ११ घण्टा बन्द गरिएको छ ।
सडक डिभिजन कार्यालय प्युठानले आज सूचना जारी गर्दै बाग्दुला–मच्छी सडकखण्डको साँघुरो घुम्तिलाई फराकिलो बनाउने योजनाअनुसार काम थालिएकाले आज मंसिर ५ गतेदेखि २८ गतेसम्म दैनिक ११ घण्टा सवारी साधनको आवतजावत बन्द गरिएको जानकारी दिएको हो ।
कार्यालयका सूचना अधिकारी कमल पुनका अनुसार बाग्दुला–मच्छी खण्ड बिहान ९ बजेदेखि ११ः३० बजेसम्म र दिउँसो २ बजेदेखि अपराह्न ४ः३० बजेसम्म मात्र खुला हुनेछ । अरु समय सडक बन्द हुने छ ।
२०४२ सालमा बाग्दुलादेखि मच्छीसम्म सडकको ट्र्याक खोलिएको थियो । सडक साँघुरो र घुम्ती पनि भएका कारण यहाँको यात्रा जोखिमपूर्ण मानिन्छ ।
सो सडक भएर प्युठानको प्यूठान नगरपालिका, झिमरुक, गौमुखी गाउँपालिकासहित गुल्मी र अर्घाखाँचीका यात्रु दैनिक ओहोर–दोहोर गर्दछन् ।
– यस समाचारको श्रोत : Online Khabar हो ।