आमिर खान र सूर्याले ‘गजिनी २’ को छायांकन एकै समयमा गर्ने

काठमाडौं । यस महिनाको सुरुमा बलिउड अभिनेता आमिर खानले निर्माता अल्लु अरविन्द र मधु मन्टेनासँग सन् २००८ को कल्ट-ब्लकबस्टर फिल्म ‘गजनी २’ को श्रृंखलाको बारेमा छलफल गरिरहेको समाचार आयो ।

‘गजिनी’का निर्माताले आमिरलाई आइडिया सुनाएको र आमिरले स्टोरीबोर्डको विकास गर्न र फेरि आउन सल्लाह दिएको पनि उक्त समाचारमा उल्लेख थियो । यतिबेला भने ‘गजिनी २’ लाई लिएर नयाँ खबर छ । सूर्यालाई शीर्ष भूमिकामा लिएर अल्लु अरविन्दले तमिल भाषामा सिक्वेल बनाउने योजना अघि सारेका छन् । सूर्याले पिंकभिल्लासँग यसबारे पुष्टि गरेका छन् ।

‘गजिनी २’ बारे बोल्दै उनले भने, ‘लामो समयदेखि यसको तयारीमा छौं । अल्लु अरविन्दले आइडिया लिएर आएका थिए र यसको सम्भावनाबारे सोधे । हामीले सोच्न सक्छौं भनेर मैले जवाफ दिएँ । हो तयारी सुरु भएको छ ।’

पिंकभिल्लाका अनुसार अल्लु अरविन्द र मधु मन्टेनाले हिन्दी र तमिल संस्करणमा गजनी २ को छायांकन एकैपटक गर्ने योजना बनाइरहेका छन् । सूर्या र आमिर ‘गजिनी २’ लाई लिएर उत्साहित छन् तर आफ्नो फिल्ममा रिमेकको ट्याग हालेको हेर्न भने चाहँदैनन् ।

निर्मातालाई दुवै फिल्म अघिपछि आउँदा नयाँपन मर्ने डर थियो । निर्माताले दुवै फिल्मलाई एकैसाथ छायांकन गर्ने तयारीसहित समाधानमा जुटेका थिए । स्रोतका अनुसार आमिर र सूर्या एकैसाथ फिल्म रिलिजको पर्खाइमा छन् तर उनीहरु सुरुमा स्क्रिप्ट अध्ययन गर्न चाहन्छन् ।

अर्को हिट फिल्म ‘दृश्यम्’ फ्रेन्चाइजीलाई पनि यस्तै शैलीमा निर्माण गर्नेतर्फ निर्माताले छलफल चलाएका छन् । उनीहरु फिल्मलाई एकैसाथ सुट गर्न र एकै दिन ठूलो पर्दामा ल्याउन चाहन्छन्, ताकि विभिन्न भाषामा दर्शकलाई एक अद्वितीय अनुभव प्रदान गर्न सकियोस् ।

– यस समाचारको श्रोत : Online Khabar हो ।