प्रदिप परियारले सम्हाले काठमाडौंको प्रशासकीय अधिकृतको कार्यभार
१० माघ, काठमाडौं । काठमाडौं महानगरपालिकाको प्रमुख प्रशासकीय अधिकृतमा प्रदीप परियारले आज पद बहाली गरेका छन् । ३ माघको मन्त्रिपरिषदको निर्णय अनुसार उनी राष्ट्रिय योजना आयोगबाट सरुवा भएर आएका हुन् ।
महानगरका प्रमुख प्रशासकीय अधिकृत बसन्त अधिकारी मधेशी आयोगमा सरुवा भएर गएका थिए । पदवहालीपछि विभागीय प्रमुखहरुसँगको परिचयात्मक कार्यक्रममा उनले, वार्षिक नीति तथा कार्यक्रममा साझा दृष्टि बनाएर समूहगत कार्य प्रणालीबाट लक्ष्य प्राप्त गर्नुपर्ने बताए ।
‘स्थानीय सरकार लोकतन्त्रको प्रयोगशाला हो । हाम्रो सेवा प्रणालीबाट यसको परीक्षण हुन्छ । यसका लागि हामीले काम गर्नु पर्नेछ,’ पदबहालीपछि उनले भने ।
२०६९ सालमा नायव सुब्बा पदबाट निजामती सेवामा प्रवेश गरेका परियार २०७० सालमा शाखा अधिकृत र २०७८ सालमा सहसचिव पदमा नाम निकालेका थिए ।
परियारले यस अगाडि प्रधानमन्त्री तथा मन्त्री परिषदको कार्यालय, राष्ट्रिय योजना आयोग, गृह मन्त्रालय, सहरी विकास मन्त्रालयलगायत कार्यालयमा काम गरिसकेका छन् ।
अष्ट्रेलियन नेशनल युनिभर्सिटीबाट पब्लिक पोलिसी विषयमा स्नातकोत्तर गरेका परियारले पहिलो पटक स्थानीय तहको प्रमुख प्रशासकीय अधिकृतको जिम्मेवारी पाएका हुन् ।
– यस समाचारको श्रोत : Online Khabar हो ।