प्रधानमन्त्रीलाई बुझाइयो नेपाल युवा घोषणापत्र

३० साउन, काठमाडौं । नेपाल युवा सम्मेलनले युवाहरुको आवाजलाई सशक्त बनाउँदै उनीहरुले सामना गरिरहेका मुख्य मुद्दाहरूबारे प्रधानमन्त्री केपी शर्मा ओलीलाई घोषणापत्र बुझाएको छ । सम्मेलनले युवाका लागि राष्ट्रिय तथा अन्तर्राष्ट्रिय सम्झौताका लागि आह्वानसमेत गरेको छ ।

सम्मेलनका सहभागीहरुले संयुक्त राष्ट्रसंघको सेप्टेम्बर महिनामा हुने ‘समिट अफ द फ्युचर’ अघि निर्णय प्रक्रियामा सहभागिता, सीप विकास र जलवायुसम्बन्धी कार्यहरूमा युवा सहभागितालाई जोड दिँदै नेपाल युवा घोषणापत्र प्रधानमन्त्री केपी ओलीसमक्ष प्रस्तुत गरेका हुन् ।

युवा तथा खेलकुद मन्त्रालय र राष्ट्रिय युवा परिषद्को नेतृत्वमा, नेपालस्थित संयुक्त राष्ट्रसंघसँगको साझेदारी र नागरिक समाजका संस्थाहरुको सहयोगमा अन्तर्राष्ट्रिय युवा दिवसको अवसरमा नेपाल युवा सम्मेलनको आयोजना गरिएको थियो ।

राष्ट्रपति रामचन्द्र पौडेलले साउन सोमबार उद्घाटन गरेको सम्मेलनमा देशका सातै प्रदेशका १ सय ७० युवा प्रतिनिधिहरुको सहभागिता रहेको थियो । उनीहरुको छनोट सातै प्रदेशमा बृहत् परामर्शबाट गरिएको थियो ।

सम्मेलनमा शिक्षा तथा डिजिटलाइजेसन, स्वास्थ्य, आप्रवासन, मर्यादित काम तथा सामाजिक सुरक्षा र जलवायु परिवर्तन तथा कृषि खाद्य प्रणालीको ६ वटा विषयगत समूहमा छलफल भएको थियो । यसमा सहभागीहरूले उनीहरूलाई ती विषयहरुले पारेको प्रभावबारे भनाइ राखेका थिए ।

२०८१ असोज ६ र ७ गते न्युयोर्कमा हुने ‘समिट फर द फ्युचर (भविष्यको सम्मेलन)’को अवसर पारेर नेपाल युवा सम्मेलन आयोजना गरिएको हो । नेपालको उच्चस्तरीय प्रतिनिधिमण्डलसहित विश्वका नेताहरूको सहभागितामा राष्ट्रसंघमा हुने उक्त सम्मेलनले सबै तहमा युवाहरूको सहभागितालाई अभिवृद्धि गर्ने विषयमाथि पैरवी गर्ने भविष्यको पुस्तासम्बन्धी सम्झौतालाई ग्रहण गर्नेछ ।

समारोहमा बोल्दै राष्ट्रपति रामचन्द्र पौडेलले युवाहरुले राष्ट्रको विकासमा योगदान गर्न सक्नेगरी नीति बन्नु आवश्यक रहेको औंल्याए । उनले भने, ‘ राष्ट्रिय विकासमा युवा सहभागिता बढाउँदै राजनीतिक, आर्थिक, सामाजिक र सांस्कृतिक अधिकारहरूको पूर्ण उपयोग गर्नका लागि युवाहरुलाई सशक्तिकरण गर्न जरुरी छ ।’

प्रधानमन्त्री केपी शर्मा ओलीले सम्मेलनको समापन गर्दै असोजमा हुने समिट अफ द फ्युचर (भविष्यको सम्मेलन)मा नेपाली युवाहरुको आशा र अपेक्षालाई साझा गरिने प्रतिवद्धता जनाए ।सम्मेलनको घोषणापत्र बुझ्दै ओलीले युवाहरुको लक्ष्य प्राप्तिका लागि सरकारले आवश्यक कदम चाल्ने आश्वासन दिए ।

यस्तै युवा सम्‍मेलनका अध्यक्ष एवम् युवा तथा खेलकुदमन्त्री तेजुलाल चौधरीले दिगो विकासका लक्ष्य प्राप्तिका लागि माबोइल, उपकरण, डिजिटल प्लेटफर्महरु, आर्टिफिसियल इन्टलिजेन्स भएको विकासका महत्वपूर्ण साधन बनेको बताए । उनले समृद्ध नेपालका लागि युवा र प्रविधिको उत्तम प्रयोग गर्न सक्नुपर्ने बताए ।

स्वस्थ, कर्मठ र उद्यमी युवा तयार पार्ने संकल्प गर्न आवश्यक रहेको भन्‍दै उनले नेपाली युवाहरुको समस्या पहिचान र समाधानको बाटो पहिल्याउन आवश्यक उनको भनाइ थियो।

संयुक्त राष्ट्रसंघको नेपालस्थित आवासीय संयोजक हाना सिंगर हाम्दीले निर्णय प्रक्रियामा युवाको अर्थपूर्ण सहभागिता, आवश्यक स्रोतहरूको पहुँच, तथा सीप र नवप्रवर्तनमा लगानीको महत्त्वलाई जोड दिँदै युवाहरूलाई आर्थिक वृद्धि, लैङ्गिक समानता , जलवायु परिवर्तनसँग लड्न र सबैका लागि समृद्ध, दिगो भविष्य निर्माण गर्न सक्षम बनाउनु आवश्यक रहेको बताइन् ।

– यस समाचारको श्रोत : Online Khabar हो ।